Къэбэрдей-Балъкъэр республикэм и хабзэубзыху органым щекIуэкIащ VIII
Парламент Хъуромэ зэIущIэр XXXII "Религия и отечественная культура: потери и
приобретения минувшего, образ будущего" Дунейпсо Хъуромэ щIэныгъэ къежэныгъэхэм
я щIыналъэ Iыхьэм хыхьэу.
ЗэIущIэм хэтащ Пятигорск, Черкесск щIыналъэхэм я архиепископ Феофилакт, УФ-
м и Къэрал Думэм и депутат Геккиев Заур, КъБР-м и Правительствэм и УнафэщIым и
къуэдзэ Хъубий Марат, КъБР-м и муслъымэнхэм я дин IуэхущIапIэм и унафэщIым и
къуэдзэ Мисиров Хъызыр, КъБР-м и Парламентым и депутатхэр, министерствэхэмрэ
IуэхущIапIэхэмрэ я унафэщIхэр, дин, жылагъуэ, щIалэгъуалэ зэгухьэныгъэхэм,
щэнхабзэм, егъэджэныгъэм я лIыкIуэхэр, студентхэр, щIэныгъэлI ныбжьыщIэхэр, КъБР-м
и Парламентым и ЩIалэгъуалэ палатэм хэтхэр.
Тхылъэ гъэлъэгъуэныгъэмкIэ зэхыхьэр ирагъэжьащ, динымрэ щIыналъэм и
щэнхабзэмрэ теухуар. ХьэщIэхэр ирагъэблэгъащ Къэбэрдей-Балъкъэр къэрал
филармонием и «Камерата» ансамблым хэтхэм.
ЗэIущIэр къыщызэIуихым, КъБР-м и Парламентым и УнафэщI Егоровэ Татьянэ
къыхигъэщащ мы гъэм зытепсэлъыхьар лъапIэныгъэхэрщ, Урысейм къращIылIа хъыбар
зауэрщ, жылагъуэм и лъапIэныгъэхэр гъэкIуэдыныр зи лъабжьэр.
- А Iуэхугъуэхэр теухуащ къытпэщылъ шынагъуэхэм икIи лъапIэныгъэхэр
хъумэным. Абы мыхьэнэшхуэ щиIэщ динымрэ щэнхабзэмрэ, - къыхигъэщащ Егоровэ
Татьянэ.
ЗэIущIэм хэтхэм фIэхъус ярихащ Пятигорск, Черкесск щIыналъэхэм я архиепископ
Феофилактрэ КъБР-м и ДУМ-м и унафэщIым и япэ къуэдзэ Мисиров Хъызыррэ.
Зытепсэлъыхь Iэухугъуэм теухуа я Iуэху еплъыкIэхэм къытеувыIащ КъБР-м
щэнхабзэмкIэ и министр Къумахуэ Мухьэдин, КъБР-м лъэпкъ Iуэхухэмрэ жылагъуэ
проектхэмкIэ и министр КIурашын Анзор, тхыдэ щIэныгъэхэм я доктор, РАН-м и КБНЦ-
м и унафэщIым и къуэдзэ, КъБР-м и щIэныгъэлI, IэщIагъэлI щIалэхэм я Советым и
унафэщI Абазэ Алексей, Гуманитар къэхутэныгъэхэмкIэ институтым этнологиемрэ
этнографиемкIэ и секторым и унафэщI, тхыдэ щIэныгъэхэм я кандидат Прасолов
Дмитрий, "Государственная национальная библиотека КБР имени Т.К.
Мальбахова" дэфтэрхэр хъумэнымкIэ и фондым и къудамэм унафэщI
Кушбокъуэ Зитэ, КъБР-м Егъэджэныгъэмрэ щIэныгъэмкIэ и министерствэм и
«ДыгъафIэ къалэ» центрым и егъэджакIуэ Таз ФатIимэ, КъБР-м и Iуащхьэмахуэ
районым и Тырныауз къалэм и «Гимназие» №5-м и унафэщIым и къуэдзэ
Кадниковэ Светланэ.
Архиепископ Феофилакт игъэлъэпIащ епархием сабийхэмрэ зи ныбжьыр
илъэс 20 иримыкъуахэм ядэлажьэ, егъэджэныгъэ, гъэсэныгъэ Iуэхухэм хэтхэм
папщIэ къызэрагъэпэща "За нравственный подвиг учителя" XVIII урысейпсо
зэпеуэм щытекIуахэр.
Апхуэдэу Iэ традзащ Пятигорск епархиемрэ КъБР-м и Жылагъуэ
палатэмрэ зэрызэдэлэжьэнум. Абы хэтащ архиепископ Феофилакт, КъБР-м и
Жылагъуэ палатэм и унафэщI Берд Хьэзрэталий.