2023 гъэм жэпуэгъуэм и 16-20-хэм Москва щекIуэкIащ – хъыбарегъащIэ
IуэхущIапIэхэм я «Вера и слово» Х юбилей фестивалыр. Ар къызэригъэпэщащ Члисэмрэ
жылагъуэмрэ хъыбарегъащIэ IуэхущIапIэхэмрэ я зэхущытыкIэхэмкIэ Синод къудамэр.
Фестивалыр илъэситI къэс зэ къызэрагъэпэщ, 2004 гъэм щыщIэдзауэ. Мы гъэм ар теухуауэ
щытащ - «Церковь и общество: традиционные ценности и глобальные вызовы».
Фестивалым хэтхэр 400-кIэ нхъыбэ хъуащ.
Пятигорск, Черкесск щIыналъэхэм я архиепископ Феофилакт и арэзыныгъэкIэ
Пятигорск епархием и лIыкIуэу абы хэтащ хъыбарегъащIэ-тхылъ тедзапIэ къудамэм и
унафэщI, епархием и пресс-IуэхущIапIэм и щоджэн нэхъыжь Самохин Михаил.
Жэпуэгъуэм и 18-м «Вера и слово» фестивалым хыхьэу къызэрагъэпэщащ «Единое
информационное пространство Церкви: взаимодействие с епархиями за пределами
России» зэхыхьэр. Абы къыщыпсэлъащ Азербайджаным, Белоруссием,
Тыркуменистаным, Узбекистаным, ФРГ-м я лIыкIуэхэр. Ахэр я Iуэху бгъэдыхьэкIэхэмкIэ
зэхъуэжащ, къэрал, жылагъуэ зэхущытыкIэхэм и IуэхукIэ. Урыс Чристэн Члисэм
Тыркуменистаным и Патриаршэ благочинием и екIуэлIапIэхэм я хъыбарегъащIэ Iуэхухэм
къытеувыIащ Пятигорск епархием и лIыкIуэр.
Жэпуэгъуэм и 19-м Москва къалэм КъегъэлакIуэ Христос и цIэр зезыхьэ
кафедральнэ соборым щекIуэкIащ фестивалым и Iуэху нэхъыщхьэр – Москварэ Урысей
псомрэ я Патриарх Кирилл зэхыхьэм хэтхэмрэ я зэIущIэр. Патриарх лъапIэ Кирилл члисэ
соборым и утым фIыщIэ щахуищIащ зэхыхьэм хэтхэм икIи къызэхуэсахэм узэщIыныгъэ
псалъэкIэ захуигъэзащ.
Урыс члисэм и Iэтащхьэм жэуап иритащ фестивалым хэтхэм я упщIэхэм. ИкIи
зэхыхьэр и кIэм щынэблагъэм зэхуэсахэм фIыщIэ яхуищIащ, Тхьэр къадэIэпыкъунуи
захуигъэзащ.
А махуэм дыдэм КъегъэлакIуэ Христос и цIэр зезыхьэ Соборым щагъэлъэпIащ
члисэ хъыбарегъащIэ IэнатIэхэм я лIыкIуэхэр. Щоджэн нэхъыжь Самохин Михаил иратащ
«Мир и согласие» Синод къудамэм и медалым и етIуанэ нагъыщэр.