Къэрэшей-Шэрджэсым къыщызэIуахащ «Всемирный русский народный собор»
международнэ жылагъуэ зэгухьэныгъэм и щIыналъэ къудамэ. ВРНС-м и щIыналъэ
къудамэм и зэхуэс Черкесск фокIадэм и 12-м щригъэкIуэкIащ Пятигорск, Черкесск
щIыналъэхэм я архиепископ Феофилакт. Зэхыхьэм хэтащ КъШР-м и ЦIыхубэ Зэхуэсым
(Парламентым) и УнафэщI Иванов Александр, урысейпсо урыс цIыхубэ зэхуэсым и
Iэтащхьэ Малофеев Константин, КъШР-м и муслъымэнхэм я Духовнэ управленэм и кадий
Лайпанов Муратбий-хьэжы, нэгъуэщIхэри.
КъШР-м и Парламентым и УнафэщIым фIэхъус ярихащ КъШР-м и Iэтащхьэ
Темрезов Рашид къыбгъэдэкIыу. Урыс Чристэн Члисэм ВРНС-м хуищIа хэлъхьэныгъэр
къыхигъэщащ, политикхэмрэ жылагъуэ лэжьакIуэхэмрэ Соборым Iуэху зэIумыбзхэм я
хэкIыпIэхэм теухуа я Iуэху еплъыкIэхэм зэрыщытепсэлъыхьыр, къэралым и
зыужьыныгъэм и стратегиер зэраубзыхур жиIэри.
Зэхуэсым щыхахащ къудамэм и правленэр, абы и унафэщIым и къуэдзэхэр.
Апхуэдэщ архиепископ Феофилакт, Парламентым и спикер Иванов Александр,
щIыналъэм и Жылагъуэ палатэм и унафэщI Ляшовэ Еленэ.
***
Урысейпсо цIыхубэ соборыр – урысейпсо жылагъуэ зэхуэсщ, 1993 гъэм
къэунэхуауэ. Соборым и Iэтащхьэр Москварэ Урысей псомрэ я Патриарх Кириллщ.
Соборым и зэхуэсхэм хэтщ властым и лIыкIуэ псори, жылагъуэ зэгухьэныгъэхэм я
унафэщIхэр, Урысейм и щоджэнхэр, хабзэхъумэ IэнатIэхэм я лэжьакIуэхэр, еджапIэ
нэхъыщхьэхэм я егъэджакIуэхэмрэ студентхэмрэ, щIэныгъэмрэ щэнхабзэмрэ я
лэжьакIуэхэр, урыс зэгухьэныгъэхэм я лIыкIуэхэр.