2023 гъэм дыгъэгъазэм и 18-м, махуэшхуэм, Псыхуабэ, Черкесск щIыналъэхэм я
архиепископ Феофилакт махуэшхуэ тхьэлъэIу щригъэкIуэкIащ Черкесск и Покров члисэм
и щоджэнхэм Псыхуабэ епархием и Ищхъэрэ Къэрэшей-Шэрджэс округым и благочиннэ,
унафэщI, щоджэн нэхъыжь Нартов Александррэ къардэн нэхъыжь Кубэ Димитрийрэ я
пашэу.
Пастыр нэхъыщхьэм и гъусэу Тхьэ елъэIуащ Черкесск щыпсэухэр. Щихънагъыр
махуэшхуэ Инджылым къеджащ, гъэнэхуа дагъэм щыщ екIуэлIапIэм кIуэхэм ящихуэри
фIэщхъуныгъэ зиIэхэм узэщIыныгъэкIэ захуигъэзащ. Апхуэдэу щоджэн нэхъыщхьэр
члисэм и щоджэн Птушкин Сергий ехъуэхъуащ пресвитор къулыкъум зэрыпэрытрэ илъэс
бжыгъэ зэрырикъум папщIэ.
Махуэшхуэм, 2023 гъэм щIышылэм и 19-м, архиепископ Феофилакт тхьэлъэIу
литургие щригъэкIуэкIащ Черкесск къалэм и Никольскэ члисэ зэхуэхьэсам. Щоджэн
нэхъыщхьэм къулыкъур драгъэкIуэкIащ члисэ зэхуэхьэсам и щоджэнхэм ключар щоджэн
нэхъыжь Кузнецов Сергийрэ къардэн нэхъыжь Кубэ Димитрийрэ. Пастыр нэхъыщхьэм и
гъусэу Тхьэ елъэIуащ къалэдэсхэмрэ Кубан къэзакъыдзэм и Баталпашинскэ къудамэм и
къэзакъхэмрэ. Щихънагъым фIэщхъуныгъэ зиIэхэм узэщIыныгъэкIэ захуигъэзащ.
Къэрэшей-Шэрджэсым и Iэтащхьэ Темрезов Рашид и хъуэхъур республикэм исхэм
ялъигъэIэсащ КъШР-м и ЦIыхубэ Зэхуэсым и УнафэщI Иванов Александр. ИужькIэ
архиепископ Феофилакт ЩIыхь тхылъхэмрэ фIыщIэ тхылъхэмрэ яритащ члисэ
зэхуэхьэсам и псапащIэхэм, «Баталпашинские чтения – 2022» урысейпсо щIэныгъэ-
практикэ конференцэр нэгъабэ къызэзыгъэпэщахэмрэ абы хэтахэмрэ. Архиепископ
Феофилакт члисэ зэхуэхьэсам екIуалIэхэм папщIэ псыр игъэнэхуащ.
А махуэ дыдэм архиепископ Феофилакт Матвей – Анджиевскэ къуажэм и Иоанно-
Богословскэ члисэм и унафэщIым и къуэр умэхъын ищIащ. Ар щоджэным и унагъуэм
ехъуэхъуащ, сабийм узыншагъэ иIэну.