2022 гъэм дыгъэгъазэм и 15-м Псыхуабэ и Спасскэ кафедральнэ члисэ зэхуэхьэсам
щекIуэкIащ КИФЩI-м и регентхэмрэ члисэ хорхэмрэ я «Духовная музыка в современном
мире» V щIэныгъэ-практикэ конференцэр.
Зэхуэсыр къызэIуахащ тхьэлъэIу литургиекIэ. Ар иригъэкIуэкIащ Псыхуабэ,
Черкесск щIыналъэхэм я архиепископ Феофилакт члисэ зэхуэхьэсам и щоджэнхэм я
гъусэу Псыхуабэ епархием и Админитсративнэ секретариатым и унафэщIыр я пашэу.
ТхьэлъэIу уэрэдхэр жаIащ зэхуэсым и хорым хэтхэм художественнэ унафэщI икIи
Москва и Синод хорым и дирижер нэхъыщхьэ Пузаков Алексей. Конференцэм Кавказ
Ищхъэрэ федеральнэ округым и епархие псоми щыщ цIыху 212-рэ зэхуишэсащ.
Зэхыхьэм и пленарнэ зэIущIэр Москварэ Урысей псомрэ я Патриархым и деж урыс
члисэ уэрэдхэр жыIэнымкIэ щылажьэ Члисэ-жылагъуэ советым и унафэщI, Тверскрэ
Кашинскрэ я митрополит Амвросий и фIэхъускIэ къызэIуахащ. ХьэщIэхэм гуапэу
фIэхъус ярихащ архиепископ Феофилакт.
ЗэIущIэм хэтхэр тепсэлъыхьащ Iуэху зэIумыбзхэмрэ члисэ уэрэдхэм, Кавказ
Ищхъэрэм и хор щэнхабзэм зегъэужьыным. ИужькIэ мастер-класс итащ Пузаков Алексей.
Конференцэр и кIэм щынэблагъэм, Ставрополь крайм опереттэмкIэ и театрым
кIэух концерт щекIуэкIащ. Абы и япэ Iыхьэм хорихым – духовнэ музыкэмкIэ «Свет
Христов» Патриаршэ дунейпсо фестивалым щытекIуахэм зыкъыщагъэлъэгъуащ. ЕтIуанэ
Iыхьэм Сафоновым и цIэр зезыхьэ Кавказ Ищхъэрэ къэрал филармонием и хорым и
программэр къатащ.
***
Конференцэр 2016 гъэм щыщIэдзауэ Псыхуабэ, Черкесск щIыналъэхэм я архиепископ
Феофилакт и арэзыныгъэкIэ ирагъэкIуэкI. Зэхуэсым илъэс зэхуэмыдэхэм и спикер хъуащ
Москварэ Урысей псомрэ я Патриархым и урыс члисэ уэрэдхэр жыIэнымкIэ и Члисэ-
жылагъуэ советым и унафэщI щоджэн нэхъыжь Агейкин Александр, «Со-действие»
Чристэн гуманитарнэ институтым и регент, уэрэджыIакIуэ факультетым и декан
Кустовский Евгений, щэнхабзэмкIэ проректор, Санкт-Петербург и духовнэ академием и
регент къудамэм и унафэщI икIи щэнхабзэмкIэ и проректор Гундяевэ Еленэ.