2022 гъэм жэпуэгъуэм и 14-м Черкесск къалэм и Покров къэзакъ члисэм
щагъэлъэпIащ пащтыхь шэнтиуэ махуэшхуэр. ТхьэлъэIу литургием щызэхуэсащ
щIыналъэм щыпсэухэмрэ абы и хьэщIэхэмрэ. Зэгъусэ тхьэлъэIу нэужьым екIуэлIапIэм
кIуэхэр ирагъэблэгъащ шэджэгъуашхэм. ИужькIэ, члисэм и Iэгъуэблагъэм, Баталпашинскэ
къэзакъхэм Кубань къэзакъыдзэм и махуэр щагъэлъэпIащ.
Мы гъэм Черкесск къалэм и Покров члисэр илъэси 120-рэ зэрырикъур
щагъэлъэпIащ. Дэфтэрхэм зэритымкIэ, 1902 гъэм Никольскэ члисэ Баталпашинскэ
центрым щыIар зэпкърахри станицэм и ипщэ лъэныкъуэмкIэ ягъэIэпхъуащ. ЯгъэIэпхъуа
нэужь члисэр Тхьэм и Анэм и Покровым и цIэкIэ ягъэнэхуащ.
Члисэм и юбилейм и цIэкIэ, Къэрэшей-Шэрджэсыр илъэси 100 зэрырикъум папщIэ
Черкесск къалэм ЩэнхабзэкIэ и унэм къалэ администрацэр и дэIэпыкъуэгъуу Покров
хорым и концерт щекIуэкIащ. Зыкъагъэлъэгъуэным и пэ къихуэу, ззэхуэсахэм фIэхъус
ярихащ мэрием и унафэщIым и къуэдзэ Иенсен-Данильчук Еленэ.
Къалэм и Никольскэ члисэ зэхуэхьэсамрэ Покров члисэмрэ я хорыр Нартовэ Еленэ
зригъакIуэм духовнэ уэрэдхэр игъэзэщIащ. Концертыр иригъэкIуэкIащ Псыхуабэ
еапрхием и Ищхъэрэ Къэрэшей-Шэрджэс округым и благочиннэ щоджэн нэхъыжь Нартов
Александр. Абы махуэшхуэм и хьэщIэхэм ягу къигъэкIыжащ республикэм, къалэм,
Покров члисэм я тхыдэр.