2022 гъэм жэпуэгъуэм и 13-м, Псыхуабэ епархием Налшык щиIэ округым и
благочинннэ щоджэн нэхъыжь Бобылев Валентин къыщыпсэлъащ хабзэхъумэ IэнатIэхэм
я лэжьакIуэхэм я фэеплъ пэкIум, зи къулыкъу зыгъэзащIэу хэкIуэдахэм.
2005 гъэм жэпуэгъуэм и 15-м, Налшык щIэпхъэджащIэу 150-м щыщIэдзауэ 300-м
нэблагъэм хабзэхъумэ IэнатIэхэм я лэжьакIуэхэм, военкоматым, дзэ частым ятеуащ –
хабзэхъумэ органхэм я ухуэныгъэ 18-м. Апхуэдэу кхъухьлъэтапIэми теуащ.
КъищынэмыщIауэ, Iэщэ щащэ тыкуэн зыбжани яхъунщIащ. Абы къыхэкIыу хабзэхъумэ
IэнатIэхэм я лэжьакIуэ 35-рэ хэкIуэдащ, мамыр цIыху 14, террорист 95-рэ, цIыхуи 100-м
щIигъу уIэгъэ хъуащ. 2008 гъэм щыщIэдзауэ Къэбэрдей-Балъкъэрым а махуэр хабзэхъумэ
IэнатIэхэм я лэжьакIуэ зи къалэн зыгъэзащIэу хэкIуэдахэм я щыгъуэ махуэу щагъэуващ.
Фэеплъ пэкIум и пэ къихуэу къызэхуэсахэм я деж къыщыпсэлъащ республикэм и
Iэтащхьэ КIуэкIуэ Казбек. Дин IуэхущIапIэхэм я лIыкIуэхэм тхьэлъэIухэр ирагъэкIуэкIащ
хабзэхъумэ IэнатIэхэм я лэжьакIуэ хэкIуэдахэм папщIэ. ПэкIум хэтхэм ягу къагъэкIыжащ
хэкIуэдахэм я фэеплъыр, зы дакъикъэкIэ яхуэщыгъуэри. ИужькIэ фэеплъым удз гъэгъахэр
тралъхьащ.