2022 гъэм шыщхьэуIум и 27-м, Тхьэм и Анэм и Успения махуэшхуэм, Псыхуабэ, Черкесск щIыналъэхэм я архиепископ Феофилакт тхьэлъэIу литургиер щригъэкIуэкIащ ЕссэнтIыгу къалэм и Никольскэ члисэм. Щоджэн нэхъыщхьэм къулыкъур драгъэкIуэкIащ Псыхуабэ епархием и Административнэ секретариатым и унафэщI щоджэн Яковенкэ Илия, ЕссэнтIыгу члисэ округым и щоджэнхэм благочиннэ, члисэм и унафэщI щоджэн нэхъыжь Фещенкэ Стефанрэ къардэн нэхъыжь Кубэ Димитрийрэ я пашэу.
Пастыр нэхъыщхьэм и гъусэу Тхьэ елъэIуащ къэзакъхэр, къалэдэсхэр, зыгъэпсэхупIэм и хьэщIэхэр. Литургие нэужьым Щихънагъым члисэм и унафэщIу илъэс зыбжанэкIэ лэжьа щоджэн нэхъыжь Агеев Павел щоджэныр дунейм зэрехыжрэ илъэс щрикъу махуэм абы и кхъащхьэм деж тхьэлъэIу щригъэкIуэкIащ.
ИужькIэ архиепископ Феофилакт къалэм зэгъусэ тхьэлъэIур щригъэкIуэкIащ Пантелеимоновскэ члисэм щыщIэдзауэ Тхьэм и Анэм и «Живоносный источник» тхьэнапэм и киотым нэс. Зэгъусэ тхьэлъэIум къыхыхьащ ЕссэнтIыгу къалэм и Iэтащхьэ Некристов Александррэ УФ-м и Къэрал Думэм узэщIыныгъэмкIэ и комитетым и унафэщI Къэзакъ Ольгэ. Зэгъусэ тхьэлъэIур къалэм и махуэм и щIэдзапIэ хъуащ, шыщхьэуIум и 27-м ягъэлъапIэр.