2022 гъэм мэкъуауэгъуэм и 10-м Ленкорань къалэм и Покров члисэм Псыхуабэ, Черкесск щIыналъэхэм я архиепископ Феофилакт, Бакинскэ епархиер пIалъэкIэ зезыгъакIуэм, екIуэлIапIэм и япэ тхьэлъэIу литургиер иригъэкIуэкIащ.
Щоджэн нэхъыщхьэм къулыкъур драгъэкIуэкIащ Бакинскэ епархием и управленэм и архимандрит Алексий (Никоноров), Шарджэ (ОАЭ) къалэм апостол Филипп и цIэр зезыхьэ члисэм и унафэщI архимандрит Александр (Заркешев), Прикаспийскэ округым и благочиннэ щоджэн нэхъыжь Асташкин Александр, Бакинскэ епархием и пресс-секретарь щоджэн нэхъыжь Поминов Константинрэ къардэн нэхъыжь Токарев Вадимрэ. Литургие нэужьым Пастыр нэхъыщхьэм фIэхъусрэ хъуэхъукIэ захуигъэзащ тхьэлъэIум хэтахэм, члисэм и япэ литургием папщIэ. А махуэ дыдэм архиепископ Феофилакт епархием и щоджэнхэм я гъусэу щыIащ Урысейм и махуэм ехьэлIа гуфIэгъуэ зэхыхьэм, Урысей Федерацэм и Полномочнэ ЛIыкIуэу Азербайджаным щыIэ Бочарников Михаил къызэригъэпэщам. Михаил зэхыхьэм хэтхэм захуигъэзащ фIэхъускIэ.
***
Бакинскэ епархием и сайтым хъыбар къызэрыдигъэщIамкIэ, 2015 гъэм щIышылэм и 28-м Бакинскрэ Азербайджанскрэ я архиепископ Александр Ленкорань къалэм и ГъэзэщIаIкуэ властым Бакинскэ епархием чристэн къалэкхъэм щыIэ хэщIапIэр къратыным теухуауэ зэрызыхуигъэзам арэзы техъуащ. Зыхуеину ахъшэр зэхадза нэужь 2019 гъэм ирагъэжьащ а IуэхущIапIэр зыхуей хуагъэзэн икIи члисэ ящIащ. Зэгъэпэщыжын лэжьыгъэхэм хыхьэу ухуэныгъэм и лъабжьэр ягъэбыдащ, и унащхьэмрэ и лъэгумрэ зэрахъуэкIащ, куполыр ягъэуващ, кхъэр къызэрыхухьар зэрагъэпэщыжащ, куэбжэр зэрахъуэкIащ, Iэгъуэблагъуэр къагъэщIэрэщIэжащ.