Черкесск и Никольскэ члисэ зэхуэхьэсам щекIуэкIащ Урыс Члисэм Тхьэм папщIэ бэлыхь куэд зрагъэшэчахэмрэ гуэныхьхэр зрагъэIуэтэжахэмрэ я фэеплъ щIэныгъэ-практикэ конференцэр. Абы хэтащ Черкесск къалэм и колледжхэм я студентхэр.
Зэхыхьэм и хьэщIэхэм фIэхъус ярихащ члисэ зэхуэхьэсам и ключарь щоджэн нэхъыжь Кузнецов Сергий. Абы архиепископ Феофилакт и фIыщIэ псалъэхэр ялъигъэIэсащ. Апхуэдэу лъэпкъ, цIыхубэ коммуникацэхэмрэ печатымкIэ КъШР-м и министрым и къуэдзэ Гузко Сергий, Урыс Чристэн Члисэмрэ совет властымрэ я зэхущытыкIэхэм хэзыгъэгъуэзар.
КъШР-м и Жылагъуэ палатэм лъэпкъ, дин зэхущытыкIэхэмкIэ и комитетым и унафэщI Дейдименкэ Игорь ягу къигъэкIыжащ къэзакъхэр я щIыналъэм зэрырагъэIэпхъукIауэ щытар. «Царьград» зэгухьэныгъэм и щIыналъэ къудамэм и унафэщI Струговцов Денис гу лъаригъэтащ зи фIэщхъуныгъэм папщIэ гузэвэгъуэ хэтахэм икIи абыхэм зэрахьа лIыгъэмрэ я шыIэныгъэмрэ щапхъэ трахыну къыхуриджащ.
Тхыдэ щIэныгъэхэм я кандидат, «День республики» газетым и редактор нэхъыщхьэ Кратов Евгений совет къэралыгъуэм и политикэм къытеувыIащ, Псыхуабэ епархием щихъхэр канон щIынымкIэ и комиссэм и секретарь щоджэн Гурин Александр къытеувыIащ Къэрэшей-Шэрджэсым 1918-1937 гъэхэм фIэщхъуныгъэ зиIа и щихъхэм.
Апхуэдэу конференцэм къыщеджащ колледжхэм я еджакIуэхэм я докладхэм. Конференцэм хэтахэр еплъащ щоджэнхэм я пасэрей сурэтхэм, Къэрэшей-Шэрджэсым зи фIэщхъуныгъэм къыхэкIыу гугъу щрагъэхьахэм икIи зыхагъэгъуэзащ «Инок» чристэн фондым и «И верою утвердится…» выставкэм.