Гъэлъэгъуэныгъэр къыщызэIуахащ «Россия. Моя история» музей-выставкэ комплексым и утым, архимандрит Евлогий и арэзыныгъэкIэ Афон бгым тет Пантелеимон къулъшырыфым и унафэщIым УФ-м и Президентым и полномочнэ лIыкIуэу КИФЩI-м щыIэм и аппаратыр и дэIпыкъуэгъуу.
Афон бгы лъапIэр – Асимов Костас и гъащIэмрэ и творчествэмрэ темэ нэхъыщхьэу щыпхышащ илъэс 30-м щIигъуауэ. Псыхуабэ сурэтыщIым къишащ Германием, Польшэм, Чехием, Италием, Швейцарием, Франджым, Великобританием, Москва ехъулIэныгъэхэр яIэу зыщыIущIа и лэжьыгъэхэр.
Сурэт 200-м щIигъу утыку кърихьащ: лъапIэныгъэхэм я сурэтхэр, тхьэлъэIухэр, монаххэм я лэжьыгъэхэр, щIыуэпсым и теплъэхэр, Афон къулъшырыф ухуэныгъэхэр. Афоным и нэхъыжьхэм, монаххэм я портретхэми увыпIэфI щиубыдащ гъэлъэгъуэныгъэм. Езы сурэтыщIым зэрыжиIэмкIэ, ар щихъым щIыналъэм, абы щыпсэухэм яхуиIэ лъагъуныгъэр къызэригъэлъагъуэщ».
Выставкэр къыщызэIуахым хэтащ Псыхуабэ, Черкесск щIыналъэхэм я архиепископ Феофилакт, УФ-м и Президентым и полномочнэ лIыкIуэу КИФЩI-м щыIэ Чайкэ Юрий, Ставрополь крайм и правительствэм и унафэщIым и къуэдзэ Давыдов Денис, щIыналъэм щэнхабзэмкIэ и министр Лихачевэ Татьянэ.
- МыкIуэдыжын гъащIэ къыщыгъэлъэгъуащ лэжьыгъэхэм. Ди гъащIэм щынэхъ лъапIэ дыдэр, зэи уасэншэ мыхъур. Дэ насыпыфIэ дызыщIыр – фIэщхъуныгъэр, - щыжыIащ Псыхуабэ, Черкесск щIыналъэхэм я архиепископ Феофилакт и сайтым.
Чайкэ Юрий Асимус Костас тыгъэ хуищIащ фIыщIэ тхылъыр, «Кавказ Ищхъэрэм и духовнэ узэщIыныгъэм хуищIа хэлъхьэныгъэхэм папщIэ».