2021 гъэм щэкIуэгъуэм и 27-м КъБР-м и Котляревскэ станицэм щызэхуэсащ атаманым и советыр, Тэрч-Малкэ къэзакъ зэгухьныгъэм и япэ атаман Клевцов Михаил илъэс 25-рэ зэрырикъум папщIэ. Есаул, ТМКО-м щIыхь зиIэ и атаман Клевцов Михаил 1936 гъэм щэкIуэгъуэм и 21-м къалъхуащ.
Къэбэрдей-Балъкъэрым щIыхь зиIэ икIи и къэрал лэжьакIуэ цIэрыIуэ тэрч къэзакъыр Котляревскэ станицэм къыщыхъуащ. Лэжьыгъэм и Бэракъ Плъыжьыр зыхуагъэфэща «Красная нива» колхозым и унафэщIу, щIы комитетым и Iэтащхьэу, КъБР-м и Правительствэм хэту щытащ. Клевцов Михаил ящыщ зы хъуащ КъБР-м къэзакъыгъэр къыщызэгъэпэщыжыным, къэзакъхэм я тхыдэр, чристэн диныр хъумэным хэлъхьэныгъэфI хуищIащ.
Атаман советым и лэжьыгъэр ирагъэжьэным и пэ къихуэу дунейм ехыжа нэхъыжьхэм я фэеплъыр тхьэлъэIукIэ ягу къагъэкIыжащ, Георгий и кавалерхэм я фэеплъым удз гъэгъахэр тралъхьащ. Зэхыхьэр станицэм и музейм щыпащащ.
Псыхуабэ епархием Налшык щиIэ округым и благочиннэ щоджэн нэхъыжь Бобылев Валентин юбилярым тыгъэ хуищIащ щоджэн нэхъыщхьэм къыбгъэдэкI щIыхь тхылъыр икIи Псыхуабэ, Черкесск епархием и архиепископ Феофилакт къыбгъэдэкI хъуэхъур ялъигъэIэсащ.