КИФЩI-м и къалащхьэм и сайтым къызэритымкIэ, 2021 гъэм шыщхьэуIум и 26-м Псыхуабэ щекIуэкIащ егъэджакIуэхэм я къалэпсо конференцэ. Ахэр тепсэлъыхьащ «Егъэджэныгъэ» лъэпкъ проектыр зэрагъэзащIэм, профсоюзхэм егъэджакIуэхэм мылъку и IуэхукIэ я Iуэху зэIумыбзхэр ягъэзэкIуэным теухуауэ зэфIагъэкIхэм, зэфIэкI зиIэ сабийхэм ядэIэпыкъуным, егъэджэныгъэм и гъэсэныгъэ Iуэхухэм, егъэджакIуэ щIалэм и ехъулIэныгъэхэм. Гъэмахуэм зэфIагъэкIахэр къапщытэжащ, егъэджакIуэ, гъэсакIуэ нэхъыфIхэр ягъэлъэпIащ.
Мы гъэм конференцэхэм я къызэгъэпэщыкIэр нэгъуэщIщ: егъэджэныгъэ зэхуэсым еджакIуэхэр хэтащ. НыбжьыщIэхэм гъэ еджэгъуэм къриубыдэу зыIэрагъэхьа ехъулIэныгъэхэр къапщытэжащ: щIыналъэ, федеральнэ зэпеуэхэмрэ олимпиадэхэмрэ зэрыщытекIуам къытеувыIащ, я щIэныгъэ, творческэ зэфIэкIхэм тепсэлъыхьащ.
- Сабийхэм я текIуэныгъэр – адэ-анэхэм я лъагъуныгъэрщ, егъэджакIуэхэм я фIэщхъуныгъэрщ, - жеIэ архиепископ Феофилакт, шыщхьэуIу зэхуэсым хэтам. – А тIур зэуIуу нэгъуэщIыпIэ ущрихьэлIэфыну къыщIэкIынкъым. А фIэщхъуныгъэр нэхъ мащIэ хъунукъым, къару зыщIэмылъыж шыгъуи хъунукъым, - къыщыхьащ Пастыр нэхъыщхьэм и псалъэхэр къалэ сайтым.
- Нобэ егъэджэныгъэм теухуа Iуэхугъуэхэр – лъэпкъ Iуэхущ, - къыхигъэщащ УФ-м и Къэрал Думэм и депутат Казаковэ Ольгэ:
- Властым и орган псоми абы хуэфащэ гулъытэ хуащI, Президентым, жылагъуэм, егъэджакIуэхэм, адэ-анэхэм, - школым мыхъуу, къэралым и къэкIуэнум игъэгузавэ дэтхэнэми.
- Гъэ еджэгъуэщIэм екIуу зыхуэдгъэхьэзыращ – къыхигъэщащ Псыхуабэ и Iэтащхьэ Ворошилов Дмитрий. – Школыр зэгъэпэщыжыным ехьэлIа лэжьыгъэшхуэ зэфIэдгъэкIащ – абы папщIэ егъэджэныгъэ IуэхущIапIэхэм, адэ-анэхэм, IуэхущIапIэ-спонсорхэм фIыщIэ фхудощI. Къалэм и Iэтащхьэм и фIыщIэ тхыгъэхэр иратащ школхэмрэ сабий гъэсапIэхэмрэ фокIадэм и 1-м хуагъэхьэзырын папщIэ, IуэхущIапIэхэр зехьэным, Iэгъуэблагъуэхэр зыхуей хуэгъэзэным. ЕгъэджэныгъэмкIэ министерствэм и щIыхь тхылъхэр иратащ псыхуабэдэс егъэджакIуэ 16-м.
КъищынэмыщIауэ, «Гордость отечественного образования-2021» урысейпсо зэпеуэм щытекIуахэм дипломхэр иратащ, курыт еджапIэ №6, №12-м щеджэхэм. «Колокольчик» сабий гъэсапIэ №16-м иратащ «Илъэсым и сабий гъэсапIэ» урысейпсо зэхьэзэхуэм зэрыщытекIуам папщIэ. «Лучшая дошкольная образовательная организация-2021» VII урысейпсо зэпеуэм и лауреат хъуащ «Мишутка» сабий гъэсапIэ №46-м и гупыр.