2021 гъэм мэкъуауэгъуэм и 13-м Баку къалэм тхьэлъэIу литургие нэужьым щихъхэм я кафедральнэ члисэ зэхуэхьэсам Бакинскрэ Азербайджанскрэ я архиепископ Александр иужьрей гъуэгуанэм щытрагъэувэжащ.
ХьэдэщIэлъхьэ къулыкъур иригъэкIуэкIащ Москва Патриархием и Iуэхухэр зезыгъакIуэ митрополит Воскресенский Дионисий. Абы къулыкъур драгъэкIуэкIащ Казанскрэ Татарстанскрэ я митрополит Кирилл, Липецкрэ Задонскрэ я митрополит Арсений, Псыхуабэ, Черкесск щIыналъэхэм я архиепископ Феофилакт, Бакинскэ епархиер пIалъэкIэ зезыгъакIуэр.
Митрополит Дионисий къеджащ Москварэ Урысей псомрэ я Патриарх Кирилл архиепископ Александр дунейм зэрехыжам папщIэ къигъэхьа псалъэхэм.
Апхуэдэу гузэвэгъуэ тхыгъэ къагъэхьащ Кавказым ис муслъымэнхэм я Управленэм и унафэщI Шейх-уль-Ислам гаджи Аллахшукюр Паша-заде.
Дунейм ехыжам Александр иужьрей гъуэгуанэ трагъэувэжыну къэкIуащ Азербайджан Республикэм и унафэщIхэм я лIыкIуэхэр, жылагъуэ лэжьакIуэхэр, щоджэнхэр, Азербайджаным фIэщхъуныгъэ зиIэ и цIыхухэр, дунейм ехыжам и благъэхэмрэ Iыхьлыхэмрэ. Архиепископ Александр Баку щыщIалъхьэжащ.