2021 гъэм накъыгъэм и 14-м Псыхуабэ епархием и ЩIалэгъуалэ центрым щызэхэтащ «Отчизны верный сын» VIII Евдокимовскэ къеджэныгъэхэр. Зэхуэсыр траухуащ фIэщхъуныгъэ зиIэ джыназ ин Невский Александр къызэралъхурэ илъэс 800 зэрырикъум. Щихъым и махуэр ягъэлъэпIащ накъыгъэм и 13-м.
Хабзэ зэрыхъуауэ, лэжьыгъэр ирагъэжьэным и пэ къихуэу къэзакъ зэгухьэныгъэхэм я щоджэнхэмрэ Псыхуабэ еапрхием и щоджэнхэмрэ щызэхуэсащ генерал Евдокимовыр щыщIалъхьэжа Спасскэ кафедральнэ члисэ зэхуэхьэсам. Къулыкъур иригъэкIуэкIащ Псыхуабэ, Черкесск щIыналъэхэм я архиепископ Феофилакт.
Пастыр нэхъыщхьэм къеджэныгъэм хэтхэм захуигъэзащ икIи къэпщытакIуэхэм я гупыр иунэтIащ. Къэрэшей-Шэрджэсым, Кавказым и Минводы и къалэхэм, Новопавловск къалэм, КъБР-м и Котляревскэ станицэм и студент, класс нэхъыжьхэм щIэс щIалэгъуалэ 27-м къеджэныгъэхэм хэтхэм я пащхьэм Невский Александр теухуа я рефератхэр щыпхагъэкIащ.
Зэпеуэм щытекIуащ КъШР-м щыщ, епщIанэ классым щеджэ Брянцев Леонид. КъэпщытакIуэ гупым етIуанэ увыпIитIрэ ещанэ увыпIищрэ ятащ. Абыхэм щIыхь тхылъхэр хуагъэфэщащ, архиепископ Феофилакт и Iэр зыщIэлъхэр. Зэпеуэм и лэжьыгъэ нэхъыфIэр тхылъым хагъэхьащ. Ахэр зэхьэзэхуэм хэтахэм иратащ.
Къэзакъхэм ядэлэжьэнымкIэ къудамэм и унафэщI щоджэн нэхъыжь Фещенкэ Стефан Архиерей щIыхь тхылъхэр яритащ къэзакъ щэнхабзэмрэ хабзэмрэ фIыуэ зылъагъу Тэрч зэгухьэныгъэм и унафэщI, Минераловодскэ къалэм и къэзакъ зэгухьэныгъэм и атаман Губенко Олег, Псыхуабэ и лъахэхутэ музейм археологиемрэ щIыуэпсымкIэ и секторым и унафэщI Савенкэ Сергей.
Дамыгъэ лъапIэхэр щаритым щоджэным Щихънагъым и хъуэхъухэр щIигъужащ.