2021 гъэм мазаем и 22-м Минераловодскэ къалэм и къэзакъ зэгухьэныгъэм и Iэгъуэблагъуэм щыIэ Къэзакъ щэнхабзэ-тхыдэ центрым къэзакъ щэнхабзэр фIыуэ зылъагъу Тэрч зэгухьэныгъэм и зэхуэс щекIуэкIащ.
Абы хэтащ зэгухьэныгъэм и попечительскэ советым и унафэщI, Псыхуабэ, Черкесск щIыналъэхэм я архиепископ Феофилакт, Тэрч зэгухьэныгъэм и унафэщI, минераловодскэ къэзакъ Губенкэ Олег, попечительскэ советым хэт, Ставрополь округым и къэзакъ зэгухьэныгъэм и атаман Пальчиков Сергей, къэзакъ щоджэнхэр, атаманхэр, Тэрч къэзакъыдзэм и къэзакъхэр. Лэжьыгъэр иригъэжьащ архиепископ Феофилакт. Щихънагъым лэжьыгъэр къехъулIэну захуигъэзащ икIи зэIущIэм хэтхэм Тхьэр къадэIэпыкъуну захуигъэзащ: «Къэзакъ щэнхабзэр фIыуэ зылъагъу ди Тэрч зэгухьэныгъэм еплъыкIэ зэмылIэужьыгъуэхэр зиIэ, лъэпкъ щхьэхуэм къыхэкIа, дин, хабзэ щхьэхуэхэм тет цIыхухэр зэрызэкъуигъэувам срогуфIэ».
ЗэфIагъэкIа лэжьыгъэхэм теухуауэ къэпсэлъащ Тэрч зэгухьэныгъэм и унафэщI Губенко Олег. 2020 гъэм къэхъуахэм нэхъыщхьэхэр къыхагъэщхьэхукIащ. Ар: новочеркасскэ зауэлI-кавалеристхэм курсантхэм Минводы къалэм фэеплъ къызэрыщыхузэIуахар; Еханэ Евдокимовскэ къеджэныгъэхэр зэрырагъэкIуэкIар; шы зекIуэр – дзэ экспедицэр; зауэлI щIалэм и махуэшхуэр къызэрызэрагъэпэщар; Тэрч къэзакъыдзэм щIыхь зиIэ и къэзакъ, Урысейм и ТхакIуэхэм я зэгухьэныгъэм хэт Лобовэ Тамарэ и «Крик подстреленной птицы» тхылъыр къызэрыдагъэкIыжар; Еханэ Тэрч къыдэкIыгъуэм и гъэлъэгъуэныгъэр, Кавказ Ищхъэрэм и къэзакъхэм я тхыдэм ехьэлIа щIэныгъэ къыдэкIыгъуэр, иджырей щIэныгъэлIхэм я лэжьыгъэхэр къызытехуэр, революцэм и пэкIэ щыIа тхыдэджхэмрэ этнографхэмрэ къызэщIиубыдэу. Тхылъым и тиражыр экземпляр 1400-рэ мэхъу.
КъыдэкIыгъуэм хагъэхьащ Нартов Б. и Iэрытхыр, 1926 гъэм Прагэ щитхар, Ермоловым и батальоныр илъэс 25-рэ щрикъум щIэрыщIэу къыдагъэкIыжар, Губенко Олег и «Записки ермоловца» къыдэкIыгъуэр, Бентковский И. и «Гребенцы» лэжьыгъэр, Караулов М. и «Говор гребенских казаков», Малинин К. и «Терские казаки» (антропологие очеркыр).
ТОЛК-м и зэхуэсым хыхьэу музейм и ещанэ пэшыр къызэIуахыжащ. Абы щызэхуахьэса экспонатхэм къагъэлъагъуэ Хэку зауэшхуэм 1941-1945 гъэхэм къэхъуа Iуэхугъуэхэр, къэзакъхэр зауэхэм зэрыхэтар.