2021 гъэм щIышылэм и 24-м илъэси 102-рэ ирокъу къэзакъхэм лъэпкъ гъэкIуэд къыхуагъэкIуэну и ужь зэрихьэрэ. Черкесск и Никольскэ члисэ зэхуэхьэсам тхьэлъэIу щекIуэкIам ягу къыщагъэкIыжащ къэзакъхэр зэхэзехуэн щащIам хэкIуэда псори. ТхьэлъэIум хэтащ Кубань къэзакъыдзэм и Баталпашинскэ къудамэм и къэзакъхэр, члисэм екIуалIэхэр. Члисэ зэхуэхьэсам и щоджэн Гурин Александр зэхыхьэм хэтхэм яхутепсэлъыхьащ тхылъыщIэхэм, къэзакъхэр я щIыналъэм зэрырагъэIэпхъукIам, Кардоникскэ станицэм фIэщхъуныгъэ зиIэхэм. Александр зыубгъуауэ тепсэлъыхьащ къэзакъ Троцкий Федосей и унагъуэм, архивым къыщигъуэта дневникхэмрэ сурэтхэмрэ игу къигъэкIыжурэ. Щоджэным къыхуриджащ тхыдэ фэеплъыр яхъумэну, блэкIа щыуагъэхэм къытрамыгъэзэжыну.
А махуэ дыдэм пэкIур щекIуэкIащ Зеленчукскэ станицэм и къэзакъ зэхэзехуэн ящIахэм хуагъэува фэеплъым деж. ПэкIум и пэ къихуэу Ипщэ Къэрэшей-Шэрджэсым округым и благочиннэ щоджэн нэхъыжь Субтельный Евгений тхьэлъэIур зэхуищIыжащ. ПэкIум хэтащ КъШР-м и Зеленчукскэ районым, Зеленчукскэ станицэм я унафэщIхэр, районым и къэзакъ зэгухьэныгъэм и атаман, къэзакъ нэхъыжь Фёдоров Владимир, районым и станицэхэм я къэзакъхэр. ПэкIу нэужьым абы хэтахэм удз гъэгъахэр тралъхьащ зи щIыналъэм ирагъэIэпхъукIа, Iуэхум хэкIуэда къэзакъхэм я фэеплъым.