2020 гъэм шыщхьэуIум и 24-м Кисловодск и Пантелеимоновскэ члисэм гуэныхьхэр Iуэтэжын къулыкъумрэ Кисловодск благочинием и щоджэнхэм я зэхуэсрэ щекIуэкIащ. Гуэныхьхэр Iуэтэжыным и щэхухэр иригъэкIуэкIащ благочинием и щоджэн нэхъыжь Лиманов Гермоген. Щоджэным и къуэшхэр къыхуриджащ нэхъ куууэ ХъыбарыфIхэр зэрыт тхылъ лъапIэр яджыну, Тхьэм и псалъэхэмкIэ загъэбыдэну. Гуэныхьхэр яIуэтэжа нэужь, щоджэнхэм Гермоген я пашэу тхьэлъэIу литургиерэ члисэм и япэ унафэщI, 2016 гъэм шыщхьэуIум и 23-м дунейм ехыжа щоджэн нэхъыжь Величко Вячеслав папщIэ тхьэлъэIурэ ирагъэкIуэкIащ.
Щоджэнхэм я зэхуэсыр ирагъэкIуэкIащ благочиннэ щоджэн нэхъыжь Знаменский Иоанн я пашэу. Щоджэнхэм фIыщIэ хуащIащ архиепископ Феофилакт, пандемием и зэманым щоджэнхэм мылъкукIэ зэрадэIэпыкъум папщIэ. АдэкIэ коронавирус узыфэр зэбграмыгъэхыным ехьэлIа Iэмалхэм къытеувыIащ.
Благочиннэм щIалэгъуалэм ядэлэжьэнымкIэ и дэIэпыкъуэгъу щоджэн Тригуб Михаил къалэн къыщащIащ «Школа гражданско-правового и духовно-нравственного просвещения молодежи и лидеров общественного мнения» проектым хэтыну. Апхуэдэу зэхыхьэм щытепсэлъыхьащ благочинием и члисэхэм лэжьыгъэхэр зэрыщрагъэкIуэкIынум, екIуэлIапIэхэм теухуа хъыбархэр Яндекс системэм щызэбграгъэкIын папщIэ.
Ипщэ Къэрэшей-Шэрджэс округым и чристэн екIуэлIапIэхэм и щоджэнхэм папщIэ Зеленчукскэ станицэм и Петропавловскэ члисэм гуэныхьхэр Iуэтэжыным и щэхухэр иригъэкIуэкIащ щоджэн нэхъыжь Тарнакин Александр.
ИужькIэ щоджэнхэм я зи чэзу зэхуэс къызэрагъэпэщащ, тхьэмахуэ школхэм я санитар-эпидемие щытыкIэмрэ дерсхэр къызэрагъэпэщынум зэрыхуэхьэзырымрэ къапщытащ гъэ еджэгъуэщIэм и пэ къихуэу. Округым и лэжьыгъэм теухуа доклад щоджэнхэм я пащхьэм щищIащ благочиннэм щIалэгъуалэм ядэлэжьэнымкIэ и дэIэпыкъуэгъу Бобровский Александр.