2019 гъэм жэпуэгъуэм и 15-м Псыхуабэ и Спасскэ кафедральнэ члисэ зэхуэхьэсам и тхьэлъэIукIэ ирагъэжьащ «Золотой Витязь» X Дунейпсо Славян литературэ зэхуэсыр. Литературэ зэпеуэм и лист кIэщIым тхакIуэ 90 хагъэхьащ. ОпереттэмкIэ театрым зэхыхьэр къыщызэIуахым Псыхуабэ епархием и ЩIалэгъуалэ центрым пресс-конференцэ щатащ.
«Урыс щэнхабзэм и хабзэхэм дытетщ. Зэхуэсыр дахэу едгъэжьащ, тхьэлъэIукIэ. Къыхэгъэщыпхъэщ, зэпеуэм хэтхэм я зэфIэкIым гъэ къэс зэрыхагъахъуэр, къэпщытакIуэ гупым Урысейм и литератор нэхъыфIхэр зэрыхагъэхьэр. «Золотой витязь» зэпеуэм къыщыхах фIым я фIыжхэр», - жиIащ Дунейпсо Слявян литературэ зэхуэсым и президент, Урысейм и цIыхубэ артист Бурляев Николай.
Журналистхэм я зэпсэлъэныгъэм хэтащ Псыхуабэ, Черкесск щIыналъэхэм я архиепископ Феофилакт. Дэтхэнэ зым и дежкIи урысыбзэр бзэ къудейкъым, атIэ нэхъыбэщ», - къыщыхьащ Щихънагъым и псалъэхэр Псыхуабэ къалэм и сайтым. – Ар Тхьэ дызэрелъэIу, пщIыхь зэрытлъагъу бзэщ. Ар япэ псалъэхэр къызэрытхь бзэщ. Лъагъуныгъэр къызэрытIуатэ, къытхуагъэгъуну дызэрылъаIуэ, гугъэ зэрытщI бзэщ… Ар дызэриIэм дрогуфIэ икIи тхъумэну и ужь дитщ. «Золотой Витязь» зэпеуэм и къару нэхъыщхьэр бзэр тхъумэну дызэрхущIэкъурщ.
Ставрополь крайм и губернаторым, проектым и къызэгъэпэщакIуэхэмрэ абы хэтхэмрэ я цIэкIэ къэпсэлъащ щIыналъэм щэнхабзэмкIэ и министр Лихачевэ Татьянэ. Пресс-конференцэм къыщыпсэлъащ: «Золотой Витязь» Дунейпсо Славян литературэ зэхуэсым и унафэщI, зэхыхьэм и къэпщытакIуэхэм я нэхъыжь, тхакIуэ икIи публицист Крупнин Владимир, урыс къэрал лэжьакIуэ, хеящIэ, телеведущэ, тхакIуэ Астахов Павел, нэгъуэщIхэри.
Мы гъэм «Золотой Витязь» МСЛФ-м и дамыгъэ нэхъыщхьитI зыхуагъэфэщахэм иратыжынущ. Пушкин Александр и дыщэ медалыр иратынущ тхакIуэ, этнограф Медведевэ Галинэ (Иркутск), усакIуэ, драматург, Урысейм и ТхакIуэхэм я зэгухьэныгъэм и унафэщIым и къуэдзэ Скворцов Константин. Лауреат хъуахэм я цIэхэмрэ дипломантхэмрэ нобэ хэIущIыIу ящIынущ, зэхуэсыр щызэхуащIыжкIэ.