Тхьэм и Анэм и Хъуромэ махуэшхуэм Кисловодск и Свято-Никольскэ классическэ гимназием и 3-11 классхэм я еджакIуэхэр гимназием и унафэщI щоджэн нэхъыжь Знаменский Иоанн фIыщIэ хуащIа нэужь, Псыхуабэ епархием и члисэхэм Тхьэ елъэIуну кIуащ.
9, 10, 11 классхэм щеджэ гимназием и гъэсэнхэр хэтащ Железноводск къалэм и Ольгинскэ члисэм и тхьэлъэIу литургием. 5 классыр Тхьэ щелъэIуащ Псыхуабэ и Лазаревскэ члисэм. Абы сабийхэм лъапIэныгъэхэр щалъэгъуащ, Лермонтовхэ я унагъуэм къащIэнахэр. 6 классым и гъэсэнхэр хэтащ Дубровкэ бгым тет Георгиевскэ цIыхубз къулъшырыфым и Георгиевскэ члисэм. НыбжьыщIэхэр библиотекэм, мозаикэ, тхьэнапэ мастерскойхэм щыIащ. Ебланэ классым кIуэхэр Тхьэм и Анэм и «Живоносный источник» тхьэнапэ Нежинскэ къуажэм щыIэм кIуащ.
ЩIыналъэ лъапIэм Тхьэ елъэIуну кIуа ныбжьыщIэхэр махуэшхуэм гъуэгуанэ нэхъ жыжьэ дыдэм теуващ. Ещанэ классым щеджэхэр Архыз Ищхъэрэм и члисэжьхэм щыIащ, Тхьэм и Уэхьий Илия и цIэр зезыхьэ члисэм Тхьэ щелъэIуащ, X лIэщIыгъуэм яухуам икIи обсерваторэм дэкIуеящ, ныбжьыщIэхэм телъыджэ къащыпэплъэм – япэ уэсыр. НыбжьыщIэхэм куэдрэ ящыгъупщэжынукъым Урысейм и астрономие центр нэхъ ин дыдэр – щIэныгъэхэмкIэ Урысей академием астрофизикэмкIэ и обсерваторие хэхар, гимназием и гъэсэнхэм абы и кIуэцIым зыщаплъыхьащ, телескопым зыхагъэгъуэзащ, центрым и ухуэныгъэм къахутепсэлъыхьащ.
8, 4 классхэм я гъэсэнхэр Тхьэ щелъэIуащ Минводы къалэм и Покров члисэм Феодосий и къарум щыщ Iыхьэм деж. Сабийхэм акафист уэрэдкIэ ягу къагъэкIыжащ Тхьэм и Анэр. ТхьэлъэIу литургием Христос и щэхухэм зыщыхагъэгъуэзащ. ЕджакIуэхэр музейм щыIащ, Кавказым и Минводы и щIыналъэхэм ар къызэрызэIуахрэ илъэси 130-рэ зэрырикъур щагъэлъэпIам. Выставкэм ныбжьыщIэхэм щалъэгъуащ тхылъыжьхэр, XX лIэщIыгъуэм икухэм щыIа тхьэлъэIу Iэмэпсымэхэр, Лесовой Михаил и Iуэтэжыр зэхахащ, члисэ зэхуэхьэсар къызэрагъэщIэрэщIэжам теухуар.
ЩIыналъэ лъапIэм Тхьэ щелъэIуныр еджакIуэхэмрэ егъэджакIуэхэмрэ я дежкIэ саугъэт хъуащ. ЕкIуэлIапIэ къэс ныбжьыщIэхэм члисэхэм я унафэщIхэр гуапэу ирагъэблэгъащ, лъапIэныгъэхэм, члисэхэм я блэкIам тепсэлъыхьащ. ТхьэлъэIу нэужьым егъэджакIуэхэмрэ гимназием и гъэсэнхэмрэ махуэшхуэ Iэнэ къапэплъэрт.
1, 2 классхэм я гъэсэнхэр Никольскэ члисэ зэхуэхьэсам клирос, тыхь щIапIэ къулыкъухэм хэтащ икIи Христос и щэхухэм зыщыхагъэгъуэзащ. ИужькIэ ныбжьыщIэхэр щыIащ «Святыни земли родной» члисэ музейм. Махуэшхуэр щызэхуащIыжым гимназием и унафэщIым саугъэтхэр итащ.