2019 гъэм шыщхьэуIум и 28-м, Тхьэм и Анэм и Успения махуэшхуэр илъэси 115-рэ зэрырикъур Успенскэ Второафонскэ Бештаурскэ цIыхухъу къулъшырыфым щагъэлъэпIащ. Махуэшхуэ тхьэлъэIур ирагъэкIуэкIащ: Ставропольскрэ Невинномыскрэ я митрополит Кирилл, Львовскрэ Галицкрэ я митрополит Филарет, Псыхуабэ, Черкесск щIыналъэхэм я архиепископ Феофилакт, Гергиевскрэ Прасковейскрэ я епископ Гедеон. Щоджэн нэхъыщхьэхэм къулыкъур драгъэкIуэкIащ къулъшырыфым и щоджэнхэм, Ставропольскэ митрополием и щоджэнхэм, Урыс Чристэн Члисэм и екIуэлIапIэхэм я Патриаршэр Тыркуменистаным щызезыгъакIуэм и секретарь щоджэн нэхъыжь Копач Иоанн.
ТхьэлъэIум хэтащ Урысейм и Президентым и полномочнэ лIыкIуэу КИФЩI-м щыIэ Матовников Александр, «Спас» телеканалым и унафэщI Корчевников Борис, «Ночные волки» байкер клубыр къызэзыгъэпэща икIи абы и пашэ Залдостанов Александр «Хирург», щIыналъэ лъапIэм Тхьэ елъэIуну кIуахэр. ЦIыху 1000-м щIигъум махуэшхуэм Христос и щэхухэм зыхагъэгъуэзащ.
Махуэшхуэм и Iуэху нэхъыщхьэ хъуащ къулъшырыфым Киево-Печёрскэ Лаврым и лъапIэныгъэ нэхъыщхьэр – Тхьэм и Анэм и Успения тхьэнапэр зэрахьар. Киевскрэ Украинэмрэ я митрополит Онуфрий и тыгъэр къулъшырыфым и щоджэнархимандрит архиепископ Феофилакт къритащ Львовскрэ Галицкрэ я митрополит Филарет.
Махуэшхуэм Успенскэ члисэ зэхуэхьэсам и къулъшырыфым и уэзджынэ нэхъыщхьэр щагъэнэхуащ. Уэзджынэ 11 хъу ансамблыр Москва и «Литэкс» заводым и IэпщIэлъапщIэхэм я IэрыкIщ. Уэзджынэхэм я хьэлъагъыр – 1866 мэхъу. Уэзджынэ нэхъ иным и хьэлъагъыр килограмм 850-рэ мэхъу, нэхъ цIыкIу дыдэр килограмми 4 мэхъу.
Домбеякъ уэзджынэхэр тхьэнапэхэмрэ тхьэлъэIу псалъэхэмкIэ гъэщIэрэщIат. Уэзджынэр тезыухуар Москва щылажьэ «Центр Международного колокольного искусства» IуэхущIапIэм и IэщIагъэлIхэрщ. УэзджынэуапIэм сыхьэт трагъэуващ. Электроннэ уэзджынэм и фIыгъэкIэ, дакъикъэ 15 къэс уэзджынэхэр мэзу, Афоным и Пантелеимоновскэ къулъшырыфым и уэзджынэ уэкIэм къытезыгъэзэжыр. Сыхьэт къэс уэзджынэ иныр къоуэ.
Махуэшхуэм ирихьэлIэу архиепископ Феофилактрэ «Спас» телеканалым и унафэщI Корчевников Борисрэ зэпсэлъащ. ФокIадэм и кIэхэм каналым къыщыдэкIынущ Псыхуабэ епархием и лъапIэныгъэхэм теухуа репортаж.
Махуэшхуэр щиухым «Зелёный Афон» зэхуэсым и утым Iэнэхэр щагъэуващ, щIыналъэ лъапIэм Тхьэ елъэIуну кIуахэм папщIэ.