20I9 гъэм накъыгъэм и 23-м Урысейм и школхэм иужьрей уэзджынэр къыщеуащ. Епархием и щоджэнхэр члисэхэмрэ школхэмрэ щехъуэхъуащ крыт еджапIэр къэзыуххэм.
Суворовскэ станицэм и школ №24-м егъэджакIуэхэм, еджапIэр къэзыуххэм, еджакIуэхэм щехъуэхъуащ гъэ еджэгъуэр къызэраухымкIэ Тхьэм папщIэ бэлыхь куэд зрагъэшэча Верэ, Надеждэ, Любовь, абыхэм я анэ Софие и цIэр зезыхьэ щоджэн нэхъыжь Иванилов Роман. УнафэщIыр еджапIэр къэзыуххэм еъуэхъуащ экзаменхэр щаткIэ, гъащIэ гъуэгур къыщыхахкIэ Тхьэр къадэIэпыкъуну.
Пятигорскэ къуажэм и курыт еджапIэ №14-р къэзыуххэр щихъ Саровский Серафим и цIэр зезыхьэ члисэм щыIащ. Сабийхэр Тхьэ елъэIуащ экзаменхэр ятын папщIэ члисэм и унафэщI щоджэн нэхъыжь Дементьев Григорий и гъусэу.
Горнэ къуажэм и школым и иужьрей уэзджынэм ирагъэблэгъащ блаженнэ Московская Матронэ и цIэр зезыхьэ члисэм и унафэщIыр. Щоджэн Дзыбэ Иоанн еджапIэр къэзыухахэм ехъуэхъуащ икIи экзаменхэр щаткIэ, IэщIагъэ къыщыхахкIэ Тхьэр къадэIэпыкъуну захуигъэзащ.
Урожайнэ къуажэм и школыр къэзыуххэм захуигъэзащ члисэм и унафэщI апостол пэлъытэ, пащтыхь Константинрэ пащтыхь гуащэ Еленэрэ я цIэр зезыхьэ члисэм и унафэщI щоджэн Рубец Александр.
ЕджакIуэхэмрэ егъэджакIуэхэмрэ Котляревскэ станицэм и школ №8-м щехъуэхъуащ Покров члисэм и унафэщI щоджэн Арманов Николай.
Нижнеподкумскэ къуажэ школым кIуащ Псыхуабэ къалэ Думэм и депутат Арустамоврэ Георгиевскэ члисэм и унафэщI щоджэн Беляев Михаилрэ.
Щоджэныр ехъуэхъуащ икIи школыр къэзуххэм экзаменхэр ехъулIэныгъэ яIэу ятыну захуигъэзащ.
А махуэ дыдэм Кисловодск и Свято-Никольскэ классическэ гимназием и 9-11 классыр къэзыуххэм я иужьрей уэзджынэр къеуащ. Махуэшхуэм и хьэщIэ лъапIэ хъуащ: Къалэ Думэм и унафэщI Волошинэ Любовь, Ставрополь крайм и Думэм и депутат Торосян Аркадий, егъэджэныгъэмкIэ управленэм и лIыкIуэ Милохин Александр. ХьэщIэхэр ныбжьыщIэхэм ехъуэхъуащ экзаменхэр ехъулIэныгъэкIэ ятыну, зыхуейм я Iэр трагъэхуэну, къыхаха еджапIэм щIэтIысхьэну, щIэныгъэ яIэу я щIыналъэм къагъэзэжыну. Ставрополь крайм и Думэм и депутат Торосян Аркадий къыхигъэщащ чристэн щэнхабзэм и лъабжьэмкIэ егъэджакIуэ Знаменская Ольгэ и лэжьыгъэхэм папщIэ фIыщIэ тхылъ зэрыхуэфащэр. Школыр къэзыуххэм иужьрей псалъэкIэ захуигъэзащ гимназием и унафэщI щоджэн нэхъыжь Знаменский Иоанн. Абы Псыхуабэ, Черкесск щIыналъэхэм я архиепископ Феофилакт и псалъэ гуапэхэр яжриIэжащ икIи къыхигъэщащ чристэн гимназиер къэзыуххэр я хьэл-щэнкIэ, гъащIэкIэ, фIэщхъуныгъэкIэ куэдым я щапхъэгъэлъагъуэ хъун чристэну зэрыщыгугъыр. ЕджакIуэхэм егъэджакIуэхэм удз гъэгъахэр иратащ, уэрэд куэд жаIащ, школ гъащIэм теухуа усэхэм къеджащ. Иужьрей уэзджынэр кърагъэуэну хуит ящIащ 11 классыр къэзыуха Решетников Александррэ 1 классым кIуэ Судаковэ Полинэрэ. Зэхыхьэр щиухым еджапIэр къэзыуххэр вальс къэфащ.