2019 гъэм накъыгъэм и 22-м Псыхуабэ, Черкесск щIыналъэхэм я архиепископ Феофилакт Къэрэшей-Шэрджэсым и ЦIыхубэ Зэхуэсым хэтащ. Къэрэшей-Шэрджэсым и депутат корпусыр Спикер Иванов Александр я пашэу едэIуащ 2018 гъэм КъШР-м и властым и органхэм зэфIагъэкIахэм теухуа доклад-посланием. Ар ищIащ республикэм и Iэтащхьэ Темрезов Рашид. КъШР-м и Iэтащхьэм къигъэлъэгъуащ дызыхуэкIуэ зэманым зэфIахыну къапэщылъ зыужьыныгъэ унэтIыныгъэхэр. СыхьэтитIым къриубыдэу Темрезов Рашид тепсэлъыхьащ республикэм и унафэщIхэм зэфIагъэкIыну къапэщылъхэм, Iуэху зэIумыбзхэмрэ ахэр зэрагъэзэкIуэжынумрэ. Зэхыхьэр щиухым Темрезов Рашид Псыхуабэ, Черкесск щIыналъэхэм я архиепископ Феофилактрэ КъШР-м и муфтий Бердиев Исмэхьил-хьэжырэ фIыщIэ яхуищIащ, щIалэгъуалэм драгъэкIуэкI гъэсэныгъэм, республикэм исхэм дин зэхуэмыдэхэм итхэм я зэгурыIуэныгъэм папщIэ зэфIагъэкI лэжьыгъэхэм папщIэ. Доклад нэужьым депутатхэм Темрезов Рашид упщIэ зыбжанэкIэ зыхуагъэзащ икIи абыхэм я жэуапхэр къаIэрыхьэжащ.