2019 гъэм накъыгъэм и 12-м, Псыхуабэ епархием и члисэхэм щехъуэхъуащ екIуэлIапIэм кIуэхэм чристэн бзылъхугъэхэм я махуэм.
Железноводск и Ольгинскэ члисэм щоджэнхэм екIуэлIапIэм кIуэхэм къабгъэдэкIыу розэхэр, бранычхэр иратащ. Тхьэмахуэ школым а махуэм IутIыж концерт игъэхьэзыращ гуащэ спектакль, теплъэгъуэхэр, уэрэдхэр, усэхэр къызэщIиубыдэу. Махуэшхуэр щиухым саугъэтхэр артист ныбжьыщIэхэм иратащ, псори шей зэдефащ.
Горнэ къуажэм литургие нэужьым блаженнэ Московская Матронэ и цIэр зезыхьэ члисэм екIуалIэхэр сабийхэм щехъуэхъуащ. IутIыж концерт нэужьым IутIыж джэдыкIэхэр тхынымкIэ зэпеуэ къызэрагъэпэщащ, нэгъуэщI зэхьэзэхуэхэр щIыгъуу.
Черкесск и Сергиевскэ члисэм и тхьэмахуэ школым екIуэлIапIэм кIуэхэм папщIэ хъуэхъухэр игъэхьэзыращ. ТхьэлъэIу нэужьым шыпхъухэм ехъуэхъуащ члисэм и унафэщI щоджэн нэхъыжь Кишунов Константин.
Суворовскэ станицэм и члисэм и тхьэмахуэ школым щIэсхэм инджыл IутIыж темэр зи лъабжьэ теплъэгъуэхэр утыку кърахьащ, IутIыжым, гъатхэм теухуа усэхэм къеджащ. IутIыж фIэхъусхэр ихащ члисэм и унафэщI щоджэн нэхъыжь Иванилов Роман. УнафэщIым дэтхэнэ зы сабийми IутIыж саугъэт иритащ.
Минводы и Никольскэ члисэ зэхуэхьэсам и унафэщI щоджэн Чемодуров Кирилл екIуэлIапIэм кIуэхэм ехъуэхъуащ икIи удз гъэгъахэр яритащ. Члисэм и щIалэгъуалэм бзылъхугъэхэм хъуэхъухэр зытет буклетхэр иратащ. ЕкIуэлIапIэм и тхьэмахуэ школым и щIалэгъуалэ клубым хэтхэм IэфIыкIэхэр зэрыбгъэхьэзырыну мастер-классхэр ятащ. Ахэр сабийхэм я анэхэмрэ анэшхуэхэмрэ хуахьащ.
УнафэщI, щоджэн Иманов Алексий къыбгъэдэкIа удз гъэгъахэмрэ фIыщIэ псалъэхэмрэ чристэн цIыхубзхэм я махуэшхуэм гуапэ ящыхъуащ Эркен-Шахар къуажэм щихъ Саровский Серафим и цIэр зезыхьэ члисэм екIуалIэхэм.
Псыхуабэ епархием и дэтхэнэ зы члисэми екIуэлIапIэм кIуэхэм апхуэдэ гулъытэхэр щыхуащIащ.