Урысей Федерацэм и Лъэпкъ гвардиер къызэрызэрагъэпэщрэ илъэс 208-рэ щрикъум теухуа гуфIэгъуэ зэIущIэр 2019 гъэм гъатхэпэм и 27-м екIуэкIащ. Абы и хьэщIэ лъапIэ хъуащ УФ-м и Президентым и полномочнэ лIыкIуэу КИФЩI-м щыIэм
и аппаратым шынагъуэншагъэ IуэхухэмкIэ, зыхъумэжыныгъэмкIэ департаментым и унафэщI СэвкIуий Олег, Ставрополь крайм и Правительствэм и унафэщIым и къуэдзэ Скворцов Юрий, Псыхуабэ и Iэтащхьэ Скрипник Андрей сымэ.
Псыхуабэ епархием и лIыкIуэу абы хэтащ IэщэкIэ зэщIэузэда къарухэмрэ хабзэхъумэ органхэмрэ ядэлэжьэнымкIэ къудамэм и унафэщI щоджэн нэхъыжь Сорокин Константин, щихъхэу Иоакимрэ Аннэрэ я цIэр зезыхьэ члисэм и унафэщI щоджэн нэхъыжь Филиппов Андрей, Урысей гвардием и зы къудамэм зи нэIэ тетыр.
ЛэжьакIуэхэм я махуэмкIэ ехъуэхъуащ Урысейм и лъэпкъ гвардием и федеральнэ къулыкъущIапIэм и унафэщI, армэм и генерал Золотов Виктор. «ЛIэщIыгъуитIкIэ ди къэралым и тхыдэр къыгуэхыпIэ имыIэу пыщIауэ къогъуэгурыкIуэ хабзэхъумэдзэхэм, Хэкум и деж щахь къалэныр зыгъэзащIэхэр», - щыжыIащ видео зыкъыхуэгъэзэныгъэм.
Дзэм къулыкъу щызыщIэхэм фIэхъускIэ захуигъэзащ УФ-м и лъэпкъ гвардием Кавказ Ищхъэрэ округым щиIэ къудамэм и командующэ генерал-лейтенант Гетманов Игоррэ УФ-м и Президентым и полномочнэ лIыкIуэу КИФЩI-м щыIэм и аппаратым шынагъуэншагъэ IуэхухэмкIэ, зыхъумэжыныгъэмкIэ департаментым и унафэщI СэвкIуий Олегрэ. Дзэм къулыкъу щызыщIэхэмрэ Урысей гвардием Кавказ Ищхъэрэ округым щиIэ лэжьакIуэхэмрэ фIыщIэ яхуищIащ Псыхуабэ и Iэтащхьэ Скрипник Андрей.
ГуфIэгъуэ зэхыхьэм хиубыдэу дамыгъэхэр, фIыщIэ тхылъхэр, саугъэтхэр иратыжащ Урысей гвардием къулыкъу щызыщIэхэм. Махуэшхуэр концерткIэ зэхуащIыжащ.