2019 гъэм мазаем и 22-м, Урысей Федерацэм и Президентым и грант дэIэпыкъуныгъэм и фIыгъэкIэ ягъэзащIэ проектым хыхьэу, Кисловодск къалэм и Чристэн Свято-Никольскэ классическэ гимназием щекIуэкIащ епархием и «Молодежь: свобода и ответственность» щIэныгъэ-методикэ егъэджэныгъэ конференцэр.
Конференцэм хэтащ епархием и къудамэхэм я унафэщIхэр, Кисловодск администрацэм и лIыкIуэхэр, унафэщIхэр, къалэм и курыт еджапIэхэм чристэн щэнхабзэм и лъабжьэхэр дерсыр щезыгъэджхэр, Москва къикIа хьэщIэхэр, Чристэн гимназием и еджакIуэхэмрэ егъэджакIуэхэмрэ.
. Зэхуэсым и пэ къихуэу, Кисловодск члисэ округым и екIуэлIапIэхэм я благочиннэ, Чристэн гимназием и унафэщI щоджэн нэхъыжь Знаменский Иоанн Псыхуабэ, Черкесск щIыналъэхэм я архиепископ Феофилакт къыхигъэщащ апхуэдэ конференцэхэр къызэгъэпэщын зэрыхуейр, лэжьыгъэр къызэхуэсахэм къехъулIэнуи ехъуэхъуащ. Зэхыхьэм и пэ къихуэу зыкъагъэлъэгъуащ гимназием и гъэсэнхэм, «Начальница веры Земли Русской – княгиня Ольга» литературнэ-макъамэ композицэр, щIалэ цIыкIухэм я хорым «Прощание славянки» маршыр жаIащ.
Конференцэм хэтхэм фIэхъускIэ захуигъэзащ Псыхуабэ, Черкесск епархием дин щIэныгъэмрэ катехизацэмкIэ и къудамэм и унафэщI щоджэн нэхъыжь Фаустов Константинрэ Кисловодск администрацэм щэнхабзэмкIэ и комитетым и унафэщI Сквиренкэ Иннэрэ.
«Воспитание к свободе на уроках ОПК» докладыр ищIащ Москва ПСТГУ-м социальнэ педагогикэмкIэ и кафедрэм и профессор, ОПК-мкIэ дерсым и тхылъхэр къыдэзыгъэкIа, «Духовное воспитание: история и современность», «Возрастная педагогика и психология» тхылъхэр, «История становления и развития теории духовного воспитания» монографиер къыдэзыгъэкIа Янушкявичене Ольгэ. Урыс Члисэм Тхьэм папщIэ бэлыхь куэд зрагъэшэчахэмрэ гуэныхьхэр зыIуэтэжахэмрэ я лIыхъужьыгъэм теухуа Iуэху бгъэдыхьэкIэхэр хэIущIыIу щIыным теухуауэ къэпсэлъащ епархием щихъхэр канон щIынымкIэ и комиссэм и иеромонах Елевферий (Казаков).
Курыт еджапIэ №2-м и унафэщI Хачановэ Ноннэ и псалъэр триухуащ сабийхэм я гъэсэныгъэм «Свобода как дар».
Апхуэдэу доклад ящIащ дин щIэныгъэмрэ катехизацэмкIэ благочиннэм и дэIэпыкъуэгъу Моничев Димитрий, Чристэн гимназием и 11 классым щIэс Решетников Александр, гимназием и унафэщIым гъэсэныгъэ IуэхухэмкIэ и дэIэпыкъуэгъу Синявская Татьянэ.
Апостол пэлъытэ, щихъ Ольгэ и фэеплъыр илъэс 1050 зэрырикъур щагъэлъапIэм ирихьэлIэу, конференцэр щекIуэкI пэшым выставкэ къыщызэрагъэпэщащ, джыназ иным и гъащIэмрэ гуащIэмрэ теухуауэ. Гъэлъэгъуэныгъэр утыку кърихьащ икIи щихъым и щIэинхэм тепсэлъыхьащ апостол пэлъытэ Ольгэ и цIэр зезыхьэ зэгухьэныгъэм и унафэщI, чристэн бзылъхугъэхэм я зэгухьэныгъэм и унафэщI Гавриловэ Ольгэ. Зэхыхьэм ирихьэлIэу къыдагъэкIащ епархием и щIэныгъэ-методикэ егъэджэныгъэ конференцэм и тхыгъэхэр щызэхуэхьэса «Вехи Российской истории. Царственные страстотерпцы» къыдэкIыгъуэр.
Конференцэм хэтхэм иратащ литературэхэр икIи «Знамение» щэнхабзэ-узэщIыныгъэ центрым шэджэгъуашхэ щащIым щызэпсэлъащ.