2018 гъэм дыгъэгъазэм и 31-м щыщIэдзауэ щIышылэм и 1 пщIондэ Успенскэ Второафонскэ Бештаурскэ цIыхухъу къулъшырыфым щоджэнхэмрэ щоджэнархимандритхэмрэ я гъусэу, Псыхуабэ, Черкесск щIыналъэхэм я архиепископ Феофилакт тхьэлъэIу литургие щрагъэкIуэкIащ икIи абы хыхьэу щIыналъэ лъапIэм Тхьэ елъэIуну кIуахэм я гъусэу Тхьэм и нэфI зыщыхуа Кавказым мамырыгъэ щыIэну Тхьэ елъэIуащ икIи Магнитогорск гуузу щыхэкIуэдахэм я псэр тыншыну.
«Нобэ гъащIэм и IэфIыр зыхэтщIащ, Христос и щэхухэм зыхэдгъэгъуазэри! Жэщ тхьэлъэIухэм ди къулъшырыфым апхуэдиз цIыху зэрыщызэхуишэсым срогуфIэ, ди къуэшхэ, ди шыпхъухэ! Си фIэщ мэхъу Тхьэм и Анэ Къабзащэ дыщызэхуэсам, фи унэхэри къызэрихъумэнур, фи Iыхьлыхэм, унагъуэм исхэм, ныбжьэгъухэм я гъусэу! КъегъэлакIуэ Христос дунейм къыщыкIуэну гуфIэгъуэм фыпэплъэну, гъэ дызытехьам чристэн цIэр фымыгъэпудыну!», - жиIащ архиепископ Феофилакт.
ТхьэлъэIу литургием хыхьэу дунейм ехыжахэм я псэр зэгъэну Тхьэ щелъэIуащ, Магнитогорск и подъезд къехуэхам хэкIуэдахэм. «Ар сэркIэ гузэвэгъуэщ, илъэсипщI и пэкIэ Магнитогорск си епископ къулыкъур щесхьэкIами хуэдэу. А къалэм дэсхэм Тхьэм сахуолъэIу, хэкIуэдахэм я благъэхэмрэ Iыхьлыхэмрэ сахуогузавэ, Урал Ипщэм щыпсэухэми си лъагъуныгъэр ядызогуэш!», - жиIащ Пастыр нэхъыщхьэм. Псоми ехъуэхъуа нэужь, къызэхуэсахэм Тхьэр къадэIэпыкъуну ехъуэхъуащ зыIууэ гугъуехьхэм пхыкIыфын, фIэщхъуныгъэ быдэ, лъагъуныгъэ яIэну!