2018 гъэм дыгъэгъазэм и 15-м Усть-Джегуты районым и къэзакъ зэгухьэныгъэм (КъШР) отчёт-хэхыныгъэ зэхуэс щекIуэкIащ. Абы и лэжьыгъэм хэтащ Кубань къэзакъыдзэм и атаманым и унафэщI Перваков Н.С, Баталпашинскэ къэзакъ зэгухьэныгъэм и атаман Бородкин В.П, Тхьэм и Уэхьий Михаил и цIэр зезыхьэ члисэм и унафэщI щоджэн нэхъыжь Петров Александр, район администрацэм, жылагъуэ зэгухьэныгъэхэм я лIыкIуэхэр, къэзакъ хабзэхэм тету, зэхуэсым и пэ къихуэу, бэракъыр къыщIахащ, гимныр ягъэзэщIащ, тхьэлъэIур къыкIэлъыкIуэу. Усть-Джегуты районым и къэзакъ зэгухьэныгъэм и атаман есаул Никулин Пётр и отчёт докладым 2018 гъэм къриубыдэу зэгухьэныгъэм зэфIиха лэжьыгъэхэр къызэщIикъуэжащ. Зэхуэсым и IэIэтымкIэ атаманымрэ Усть-Джегуты
районым и къэзакъ зэгухьэныгъэмрэ я правленэмрэ я лэжьыгъэр къехъулIауэ къалъытащ.
Кандидатурэ псоми тепсэлъыхьа нэужь, къэзакъхэм аргуэру атаман къалэныр дзыхь хуащIащ атаман Никулин Пётр, ревизэ комиссэм, къэзакъ судым, нэхъыжьхэм я Советым хэтынухэр хахащ. Кубань къэзакъыдзэм и атаманым и япэ къуэдзэ Перваков Николай псоми фIыщIэ яхуищIащ я лэжьыгъэм, къэзакъхэр гъэбыдэным хуащI хэлъхьэныгъэхэм папщIэ. Абы къэзакъхэр къыхуриджащ я къулыкъум нэхъыбэ щалэжьыну, районым и къэзакъ зэгухьэныгъэм нэхъ хэлэжьыхьыну, щIалэгъуалэр, я бынхэр, абыхэм я быныжхэр абы хашэну, къэзакъ щэнхабзэмрэ хабзэхэмрэ щIапIыкIыну.