2018 гъэм мэлыжьыхьым и 24-м Чристэн Свято-Тихоновскэ гуманитарнэ университет Москва щыIэм щызэхуащIыжащ еджакIуэхэм я «Чристэн щэнхабзэм и лъабжьэр» X урысейпсо олимпиадэр.
2017-2018 гъэхэм Iыхьищу зэхэт олимпиадэм хэтащ еджакIуэ 300-м щIигъу, урысей щIыналъэ 80-м щIигъум щыщу ныбжьыщIэ мини 10-м щIигъу щеджэм, апхуэдэу Белоруссием, Литва, Къэзэхъстаным, Италием, Гвинеем, Бангладеш, Люксембург щыщхэр.
Олимпиадэм и иужьрей Iыхьэм щызэхуэсащ щIыналъэ Iыхьэхэм щытекIуахэмрэ абы къыхэжаныкIахэмрэ. Урысей Федерацэм и щIыналъэ 33-м я 11-нэ классхэм щIэс еджакIуи 190-рэ хъурт ахэр. ЩIыналъэ Iыхьэм балли 135-рэ къыщызыхьахэрщ иужьрей Iыхьэм ягъэкIуар.
Псыхуабэ епархием и лIыкIуэу абы хэтащ Чристэн Свято-Никольскэ классическэ гимназием щыщхэу Сысоев Артём (10 класс), Волобуев Данил (7 класс), Синявская Полинэ (6 класс), Гилкэ Софие (6 класс). ЕджакIуэхэм лэжьыгъэхэр ягъэзэщIащ. Мы гъэм абы хагъэхьащ «Радость человеку – благотворительность его» эссе тхынымкIэ сочиненэр, «Знатоки православной культуры» егъэджэныгъэ джэгукIэр, проект-къэхутэныгъэ лэжьыгъэр, Тхьэм папщIэ бэлыхь куэд зрагъэшэчахэм теухуар. Лэжьыгъэр
ягъэхьэзыра нэужь, еджакIуэхэм папщIэ къызэрагъэпэщащ университетым и ухуэныгъэ нэхъыщхьэм зыплъыхьакIуэ – Епархием и унэмрэ Тхьэм папщIэ бэлыхь куэд зрагъэшэчахэмрэ гуэныхьхэр зрагъэIуэтэжахэмрэ я Музеймрэ. А ухуэныгъэр нэгъуэщIхэм къазэрыщхьэщыкIыр Поместнэ члисэ зэхуэхьэсар абы зэрыщрагъэкIуэкIарщ, патриарх Тихон щыхахам.
ЕджакIуэхэм я иужьрей Iыхьэр щрагъэкIуэкIым «Основы подготовки базовых заданий обероссийской олимпиады школьников» «Основы православной культуры» семинарыр Чристэн Свято-Тихоновскэ гуманитарнэ университетым щрагъэIкуэкIащ. Абы хэтащ Чристэн гимназием и унафэщIым классщIыб лэжьыгъэхэмкIэ и къуэдзэ Синявская Татьянэ.
ЕджакIуэхэм «Чристэн щэнхабзэм и лъабжьэмкIэ» X урысейпсо олимпиадэр щызэхуащIыжым, Соборнэ палатэм мэлыжьыхьым и 24-м щекIуэкIар, фIэхъускIэ абы хэтхэм зыхуагъэзащ педагогикэ факультетым и декан Скляровэ Т.В., университетым и ректор Воробьев Владимир.
Владимир олимпиадэм пашэ щыхъуахэм щIыхь тхылъхэр, дипломхэр, саугъэтхэр яритащ. 7 классым и еджакIуэ Волобуев Данил етIуанэ увыпIэ къихьащ 5-7 классхэм я деж. Гимназием и гъэсэн Гилкэ Софие эссе зэпеуэм и лауреат хъуащ 4-7 классхэм я деж. Софие лэжьыгъэр щитхым гулъытэ нэхъыбэ хуищIащ «Радость человеку благотворительность его» темэм, Инджылым щыщ псалъэхэр къигъэсэбэпу.
НыбжьыщIэхэм я дежкIэ саугъэт нэхъыщхьэ хъуащ университетым и студентхэм ягъэхьэзыра концертыр. Абы къызэхуэсахэм я гукъыдэжым хигъэхъуащ. Чристэн гимназием и унафэщI щоджэн нэхъыжь Знаменский Иоанн Москва къикIыжахэм фIыщIэ яхуищIащ, еджэным къызэрыхэжаныкIам, «Чристэн щэнхабзэм и лъабжьэмкIэ» олимпиадэм я щIэныгъэр къызэрыщагъэлъэгъуам папщIэ.