2018 гъэм гъатхэпэм и 14-м епархием и екIуэлIапIэ псоми зэхыхьэхэр щрагъэкIуэкIащ, чристэн тхылъым и махуэм теухуауэ.
Кисловодск и Свято-Сергиевскэ классическэ гимназием библиотекэ дерсхэр щекIуэкIащ. ПэщIэдзэ классхэм щеджэхэм папщIэ библиотекэм и лэжьакIуэ Михайловэ Иннэ утыку кърихьащ Урысейм тхылъ зэрыщытрадзэм и тхыдэм теухуа дерс. 5-11 классхэм щеджэхэм урыс литературэмкIэ яIэ щIэныгъэр къыщагъэнэIуащ «Что? Где? Когда?» джэгукIэм.
Къалэм и гъэлъэгъуэныгъэ пэшым къыщызэрагъэпэщащ Кисловодск и курыт еджапIэ №9-мрэ гимназие №19-мрэ я ебланэ, еянэ классхэм я еджакIуэхэм я щIэныгъэр къыщапщытэ тематикэ сыхьэт. Зэхыхьэм хэтащ Никольскэ члисэ зэхуэхьэсам и клирик щоджэн нэхъыжь Грамацкий Андрей. Щоджэныр еджакIуэхэм яхутепсэлъыхьащ Урысейм япэу тхылъ къызэрыщыдагъэкIам, къардэн Фёдоров Иван, урыс щIыналъэм тхылъ къыдэгъэкIыным зэрызыщрагъэужьам.
Къалэм и школхэм я еджакIуэхэм папщIэ сабий библиотекэ нэхъыщхьэм щекIуэкIащ «Живой родник истины – православная книга» зэхыхьэр. 6 классым и еджакIуэхэм я пащхьэм щагъэлъэгъуащ чристэн литературэ выставкэ, библиотекэм и фондым и гъэтIылъыгъэхэм щыщхэр. Чристэн щэнхабзэм и лъабжьэмкIэ викторинэ ирагъэкIуэкIащ.
Махуэшхуэ программэр къыщызэIуахым, Кисловодск члисэ округым и екIуэлIапIэхэм я благочиннэ щоджэн нэхъыжь Знаменский Иоанн еджакIуэхэм яхутепсэлъыхьащ махуэшхуэм и тхыдэм. Щоджэным еджакIуэхэм я пащхьэм щигъэлъэгъуащ Федоров Иван и «Часовник» тхылъыр. ЕджакIуэхэм защыхуигъазэм, благочиннэм къыхигъэщащ цIыхум зиужьын, абы и щIэныгъэм хигъэхъуэн папщIэ тхылъхэм я мыхьэнэр. Абы къихьащ Патриарх Кирилл и псалъэхэр – «тхылъхэм пасэрей Iущагъэхэр щызэхуэхьэсащ. Абы зыхэбгъэгъуэзэным мыхьэнэшхуэ иIэщ». ЗэIущIэр и кIэм щынэблагъэм ныбжьыщIэхэм Iэмал яIащ сабий чристэн литературэм зыхагъэгъуэзэну. Ахэр куэду выставкэм утыку къыщрахьащ.
А махуэ дыдэм Кисловодск и Пантелеимоновскэ члисэм и клирик щоджэн нэхъыжь Лагутин Андрей яIущIащ курыт еджапIэ №1-м и 7 классым и еджакIуэхэм. Щоджэныр къытеувыIащ Урысейм тхылъ къызэрыщыдагъэкIым, япэу тхылъ къыдэзыгъэкIахэу Фёдоров Иванрэ Мстислав Пётррэ. Къызэхуэсахэм я упщIэхэм жэуап иритащ.
2018 гъэм гъатхэпэм и 14-м Черкесск и Никольскэ члисэ зэхуэхьэсам и щоджэн Гурин Александр щыIащ къалэм жьы хъуахэмрэ ныкъуэдыкъуэхэмрэ я унэм икIи абы щыпсэухэм ехъуэхъуащ чристэн тхылъым и махуэмкIэ. Апхуэдэ зэIущIэ щоджэныр щекIуэкIащ Нэфхэм я урысейпсо зэгухьэныгъэм къалэм щиIэ къудамэм. А махуэ дыдэм ЕгъэджэныгъэмкIэ центр №11-м и 7 классым Урысейм ис лъэпкъхэм я псэкупсэ-щэнхабзэ лъабжьэмкIэ щата дерсыр теухуауэ щытащ Чристэн тхылъым и махуэм. Щоджэныр еджакIуэхэм яхутепсэлъыхьащ махуэшхуэм и тхыдэм икIи ахэр хигъэгъуэзащ «Велия радость» тхылъ щоджэн нэхъыжь Афонин Василий къыдигъэкIам. Махуэшхуэм хэтахэм Iэмал яIащ тхыдэм зыхагъэгъуэзэну, Черкесск и Никольскэ члисэ зэхуэхьэсам и библиотекэм щахъумэ тхьэлъэIу тхылъхэм еплъыну.
2018 гъэм гъатхэпэм и 14-м, Чристэн тхылъым и махуэм, Старопавловскэ станицэм Телъыджэ къэзыгъэхъу Николай и цIэр зезыхьэ и члисэм и щоджэн Вологин Александр, члисэм екIуалIэхэм зыщаплъыхьащ Крупско-Ульяновскэ къуажэ библиотекэм. Абы саугъэту яхьащ чристэн литературэхэмрэ классикэ лэжьыгъэхэмрэ. Щоджэным къыхигъэщащ цIыху гъащIэм тхылъым щиIэ мыхьэнэр зыхуэдэр.
2018 гъэм гъатхэпэм и 14-м Зольскэ станицэм и курыт еджапIэм и чристэн кадет классым усэ къеджэнкIэ щызэпеуащ. Ахэр къапщытащ Никольскэ члисэм и унафэщI щоджэн нэхъыжь Гичко Николай, Дзэлыкъуэ станицэм и къэзакъ зэгухьэныгъэм и лIыкIуэ Алексеев Алексей, къуажэ библиотекэм и унафэщI Ерохинэ Верэ, курыт еджапIэм и унафэщIым и къуэдзэхэр. Зэпеуэр унэтIыныгъищу зэщхьэщыхауэ щытащ: «Настоящая дружба-навсегда!», «Умей быть добрым!», «Великие святые». Зэхьэзэхуэм пашэ щыхъуахэмрэ абы щытекIуахэмрэ щIыхь тхылъхэр иратащ.
2018 гъэм гъатхэпэм и 14-м Прохладнэ (КъБР) къалэм и тхыдэ-лъахэхутэ музейм и Никольскэ члисэм и екIуэлIапIэм къызэригъэпэщащ курыт еджапIэм и «Листая древние страницы» лекцэр. ЕджакIуэхэм тхылъыжьхэм зыхагъэгъуэзащ. 18, 19 лIэщIыгъуэхэм къыдэкIа тхылъхэмрэ зэрыхуагъэфащэмкIэ 17 лIэщIыгъуэм къыдэкIа Iэрытх тхылъымрэ абыхэм я пащхьэм щагъэлъэгъуащ. НыбжьыщIэхэм славян алыфбейм – кириллицэмрэ глаголицэмрэ зыхагъэгъуэзащ, ахэр къызэзыгъэпэщахэм, ахэр щагъэхьэзырым къагъэсэбэпахэм, Iэрытх тхылъхэм хьэрфхэр зэрыщатха Iэмалхэм, тхылъхэм гъэр зэрытратхам. НыбжьыщIэхэм щIэщыгъуэ ящыхъуащ лIэщIыгъуэ зыбжанэ и пэкIэ къыдэкIа тхылъхэр. Тхьэмахуэ школым и еджакIуэхэмрэ абыхэм я адэ-анэхэмрэ папщIэ «Есть чудо на земле с названьем дивным – Книга» дерс-презентацэ ирагъэкIуэкIащ. Школым и егъэджакIуэ Истоминэ Людмилэ къызэхуэсахэр хигъэгъуэзащ Урысейм япэу тхылъ къызэрыщыдагъэкIам теухуа биографием, «Апостол» тхылъыр къызэрыдагъэкIам.
А махуэм Марьинскэ станицэм Тхьэм и Уэхьий Михаил и цIэр зезыхьэ члисэм и екIуэлIапIэ унэм щоджэныр класс нэхъыжьхэм щеджэхэм щыIущIащ. Члисэм и унафэщI щоджэн Гордин Александр къытеувыIащ ХъыбарыфIхэр зэрыт тхылъ лъапIэм уеджэным и мыхьэнэм. Тхьэмахуэ школым и егъэджакIуэ Новиковэ Наталье игъэхьэзыращ псэкупсэ литературэм и презентацэ. ЗэIущIэм хэтащ тхакIуэ Крищенко Анатолий. Ар теухуауэ щытащ генерал Котляревскэм. Новопавловск и курыт еджапIэ №2-м и 3 классым и еджакIуэхэм 8 классым щеджэхэр яхутепсэлъыхьащ классикэ литературэхэм къыщыхьа чристэн мотивхэм. Ахэр къеджащ Пушкин Александр и «Отцы пустынники» усэм. Дерсым ирагъэбюлэгъащ Петропавловскэ члисэм и унафэщI щоджэн Цапко Владислав. Щоджэныр еджакIуэхэм яхутепсэлъыхьащ Урысейм тхылъ къыщыдагъэкIыу зэрырагъэжьам. АдэкIэ тепсэлъыхьащ гуапагъэмрэ пэжыгъэмрэ ухуэзыгъэуш тхылъыфIхэм укъеджэн зэрыхуейм.
2018 гъэм гъатхэпэм и 14-м Суворовскэ станицэм и библиотекэм щекIуэкIащ Тхьэм папщIэ бэлыхь куэд зрагъэшэчахэу Верэ, Надеждэ, Любовь, абыхэм я анэ Софие сымэ я цIэр зезыхьэ члисэм и унафэщI щоджэн нэхъыжь Иванилов Романрэ библиотекэм и лэжьакIуэхэмрэ курыт еджапIэ №20-м и еплIанэ классхэм я гъэсэнхэмрэ я зэIущIэ. «Духовной книги благодать» зи фIэщыгъэ зэхыхьэрэ чристэн литературэм и выставкэрэ къызэрагъэпэщащ. Псом хуэмыдэу щIэщыгъуэ ящыхъуащ 19 лIэщIыгъуэм и кIэуххэм къыдэкIа тхылъ Роман къихьахэр. Апхуэдэ тхылъыжьхэр абыхэм иджыри къыздэсым ялъэгъуатэкъым.
А махуэм Псыхуабэ къалэ библиотекэ нэхъыщхьэм щекIуэкIащ Ипщэ- Урысей лицейм и егъэджакIуэхэмрэ еджакIуэхэмрэ яIущIащ Епархием и богословско-катехизатор курсхэм я унафэщI щоджэн нэхъыжь Симанович Олег. Зэхыхьэм хыхьэу тепсэлъыхьащ литературэм и мыхьэнэм. ЗэIущIэр и кIэм щынэблагъэм щоджэным абыхэм тыгъэ яхуищIащ Инджылыр. Псыхуабэ и Покров члисэм и тхьэмахуэ школым и гъэсэнхэм класс сыхьэтхэр щрагъэкIуэкIащ къалэм и курыт еджапIэхэу №25-мрэ №26-мрэ, Чристэн тхылъым и махуэм теухуауэ. 9-10 классхэм я еджакIуэхэм папщIэ унафэщIым и къуэдзэ икIи егъэджакIуэ Смирновэ Татьянэ къытеувыIащ Тхьэм папщIэ бэлыхь
куэд зрагъэшэча, Воронежск и архиепископ Петр (Зверев) и гъащIэм. Ар и щапхъэу къагъэлъэгъуащ фIэщхъуныгъэм, Хэкум, гъунэгъум хуаIэ лъагъуныгъэр. Апхуэдэу еджакIуэхэм захуигъэзащ Покров члисэм и клирик щоджэн Калинин Евгений. «Дэтхэнэ зы тхылъми ди акъылыр еузэщI. Тхылъ гуапэ дыкъеджэмэ, щытыкIэ зэмылIэужьыгъуэхэм дыкъызэрикIыфынум и жэуапхэр къытхуэгъуэтынущ. ФIы тефси фIы тефхынущ», - жиIащ щоджэным.
Пщыхьэщхьэ литургие нэужьым, 2018 гъэм гъатхэпэм и 14-м, ЕссэнтIыгу и Петропавловскэ члисэм и унафэщI щоджэн Гриценкэ Виталий екIуэлIапIэм кIуэхэм къахутеувыIащ чристэн къыдэкIыгъуэхэм. Зэхыхьэм хэтхэр еплъащ чристэн тхылъым теухуа тхыдэ фильм. Къызэхуэсахэр ирагъэплъащ иджырей художественнэ чристэн литературэм теухуа презентацэ.
2018 гъэм гъатхэпэм и 15-м Железноводск и Ольгинскэ члисэм щоджэн нэхъыжь Самохин Михаил IущIащ къалэм и школ №10-м и епщIанэ классым щIэсхэм. Тхылъым и мыхьэнэмкIэ ирагъажьэри, иджырей хъыбархэр къызэрагъэсэбэпым тепсэлъыхьащ. Щоджэным гулъытэ нэхъыбэ хуищIащ хъыбархэр гъэкъэбзэн зэрыхуейм. ЩIэблэм я упщIэм жэуапхэр иратащ зэхыхьэр щиухым.