Епархием и екIуэлIапIэхэм ягу къыщагъэкIыжащ хэкIуэда къэзакъхэр

26.01.2018
Просмотры: 3122

Къэрэшей-Шэрджэсым и Прикубанскэ районым и Ударнэ къуажэм фэеплъ пэкIу щекIуэкIащ, «Директивы о расказачивании» правительствэм большевикхэр къызэрищтэрэ илъэс 99-рэ зэрырикъум теухуауэ.
1919 гъэм щIышылэм и 24-м большевикхэм я лэжьакIуэ-мэкъумэшыщIэ партием и ЦК-м и Оргбюром Свердлов Яков и Iэ зыщIэлъ инструкцэр къыдигъэкIащ. Ар тхыдэм хыхьащ «директива о расказачивании» жыхуиIэу. Къэзакъхэм я щIыналъэхэм къыщытрахырт ерыскъыпхъэхэр, Iэщэхэр. Къэзакъхэр я хэкум ирагъэкIыу щIадзащ. Илъэс 18-м щыщIэдзауэ 50 зи ныбжь къэзакъхэр Ищхъэрэм яшащ.
ПэкIум хэтащ Кубань къэзакъыдзэм и атаманым и къуэдзэ къэзакъ полковник Ефремов Валерэ, ККВ-м и Баталпашинскэ къудамэм и атаман къэзакъ полковник Бородкин Виктор, республикэм и Правительствэмрэ и Парламентымрэ я лIыкIуэхэр, жылагъуэ, дин зэгухьэныгъэхэм я унафэщIхэр, Прикубанскэ, Усть- Джегутинскэ, Зеленчукскэ, Урупскэ, Отрадненскэ, Лабинскэ районхэм я къэзакъ зэгухьэныгъэхэр, Черкесск къалэм и къэзакъхэр. ПэкIум и пэ къихуэу Ищхъэрэ Къэрэшей-Шэрджэс члисэ округым и члисэхэм я благочиннэ щоджэн нэхъыжь Нартов Александр тхьэлъэIу иригъэкIуэкIащ.
2018 гъэм щIышылэм и 24-м, Зеленчукскэ, Сторожевой, Кардоникскэ станицэхэм я къэзакъ зэгухьэныгъэхэм хэтхэр Зеленчукскэ станицэм и Петропавловскэ члисэм Тхьэ щелъэIуащ лажьэншэу ягъэкIуэда къэзакъхэм папщIэ. Ар иригъэкIуэкIащ Ипщэ Къэрэшей-Шэрджэс члисэ окргым и члисэхэм я благочиннэ щоджэн нэхъыжь Субтельный Евгений. ТхьэлъэIу нэужьым къэзакъхэр зэгъусэу зи хэку зрагъэбгынахэм я фэеплъ Зеленчукскэ станицэм щагъэувам кIуащ, пэкIу къыщызэрагъэпэщам.
Преграднэ станицэм апостол пэлъытэхэу Кириллрэ Мефодийрэ я цIэр зезыхьэ члисэм хэкIуэда къэзакъхэр ягу къыщагъэкIыжыну щыхуэсащ Урупскэ районым и къэзакъ зэгухьэныгъэм и къэзакъхэр. Ипщэ Къэрэшей-Шэрджэс члисэ округым и члисэхэм къэзакъхэм ядэлэжьэнымкIэ и дэIэпыкъэугъу щоджэн Соловьев Алексий тхьэлъэIу иригъэкIуэкIащ ягъэкIуэда къэзакъхэм папщIэ.
Суворовскэ станицэм а махуэм къэзакъхэм я фэеплъым деж тхьэлъэIу щригъэкIуэкIащ Верэ, Надеждэ, Любовь, абыхэм я анэ Софие сымэ я цIэр зезыхьэ члисэм и унафэщI щоджэн нэхъыжь Иванилов Роман.
2018 гъэм щIышылэм и 24-м Котляревскэ станицэм (КъБР) зэIущIэ щекIуэкIащ, зи щIыпIэм ирагъэIэпхъукIа къэзакъхэм я фэеплъым теухуауэ. Абы ирагъэблэгъащ Налшык округым и благочиннэ щоджэн нэхъыжь Бобылев Валентин, Котляревскэ станицэм и администрацэм и Iэтащхьэ Федоренкэ А.П., атаман Скляров Д.В., район администрацэм и лIыкIуэхэр, журналистхэр, ирагъэкIа къэзакъхэм я лIыкIуэхэр.
ЗэIущIэ нэужьым къызэIуахащ Георгий и кавалерхэм я фэеплъ зэрагъэпэщыжар, Тэрч къэзакъхэм я лIыгъэм и дамыгъэр. Фэеплъым деж тхьэлъэIур щригъэкIуэкIащ Налшык округым и благочиннэ щоджэн нэхъыжь Бобылев Валентин.

3122
Фотогалерея