2017 гъэм бадзэжуэгъуэм и 14-м Ставрополь и аграрнэ университетым щекIуэкIащ «Казачьи общества в зеркале СМИ» семинарыр. Абы хэтащ Ставрополь крайм и хъыбарегъащIэ IэнатIэхэм я журналистхэмрэ редакторхэмрэ, къэзакъхэм ятеухуа тхыгъэхэр зыгъэхьэзыр район газетхэм я лэжьакIуэхэр, Кавказ Ищхъэрэм и епархиехэм я пресс- IуэхущIапIэхэр, Тэрч къэзакъыдзэм и къэзакъ зэгухьэныгъэм и атаманхэм хъыбарегъащIэ IэнатIэхэм ядэлэжьэнымкIэ я дэIэпыкъуэгъухэр. Псыхуабэ, Черкесск епархием и лIыкIуэу абы хэтащ «Лик Кавказа» газетым и редактор нэхъыщхьэ Христосовэ Еленэ.
ЗэIущIэр къызэIуихащ Ставрополь крайм и Думэм къэзакъхэмкIэ, хъумэныгъэмкIэ, парламент зэхуаку зэпыщIэныгъэхэмрэ жылагъуэ зэгухьэныгъэхэмкIэ и комитетым и унафэщI Гонтарь Юрий. Къызэхуэсахэм фIэхъус ярихащ Тэрч къэзакъыдзэм и къэзакъ зэгухьэныгъэм и атаман Журавский Александр.
Ставропольскрэ Невинномыскрэ я митрополит Кирилл и фIэхъусыр къызэхуэсахэм ярихыжащ Тэрч къэзакъ зэгухьэныгъэм и щоджэн нэхъыжь Самойленкэ Павел. Ар къеджащ митрополит Кирилл и докладым, иджырей къэзакъ зэгухьэныгъэхэмрэ хъыбарегъащIэ IэнатIэхэмрэ зэдрагъэкIуэкI лэжьыгъэхэм я мыхьэнэм теухуауэ.
Пленарнэ зэIущIэ нэужьым семинарым и секцэхэм лэжьыгъэм щыпащащ. Зэхыхьэм хэтхэм къагъэлъэгъуащ къэзакъ зэгухьэныгъэхэм я лэжьыгъэм и Iуэху зэIумыбзхэу хъыбарегъащIэ IэнатIэхэм къщагъэлъэгъуэн хуейхэр, къэзакъ зэгухьэныгъэхэм я атаманхэм я дэIэпыкъуэгъухэм я хъыбарегъащIэ лэжьыгъэхэм я механизмхэр ягъэхьэзыращ.