Библиер зэдзэкIынымкIэ Институтым и «Соломонхэ я псысэхэм я тхылъ» лэжьыгъэ тыркуменыбзэрэ урысыбзэкIэ къыдэкIар (Синод зэдзэкIыныгъэ) Тыркуменистаным утыку къыщрахьащ. Гъэлъэгъуэныгъэр мэкъуауэгъуэм и 16-м Ашхабад и Никольскэ екIуэлIапIэм и Iэгъуэблагъуэм щыIэ Патриаршэ духовно- административнэ центрым щекIуэкIащ.
«Тыркумен тхылъеджэр идогъэблагъэ дунейпсо щэнхабзэ щIэинхэм къыгуэхыпIэ зимыIэ хъуа КъуэкIыпIэ Жыжьэм и Iущагъым зыхигъэгъэгъуэзэну», - къыщыхьащ тхылъым и пэублэ псалъэм.
Гъэлъэгъуэныгъэм кърихьэлIа Тыркуменистаным и щоджэнхэмрэ екIуэлIапIэм къакIуэхэмрэ Псыхуабэ, Черкесск щIыналъэхэм я щихънагъ нэхъыщхьэ, Урыс Чристэн Члисэм и Патриаршэ благочиниехэм я екIуэлIапIэ Тыркуменистаным щыIэр пIалъэкIэ зезыгъакIуэ Феофилакт защыхуигъазэм, жиIащ: «Тхьэшхуэмрэ къыдэкIыгъуэм зи къару езыхьэлIа цIыхухэмрэ фIыщIэ яхудощI! ЕкIуэлIапIэм къакIуэ куэдым лэжьыгъэм тыркуменыбзэкIэ зыхагъэгъуэзэну Iэмал зэраIэр си гуапэщ!».
Тхылъым и жинтыр ягъэдэхащ лъэпкъ тыркумен дамыгъэкIэ. Щихънагъ нэхъыщхьэ Феофилакт Патриаршэ благочинием пастыр нэхъыщхьэ къулыкъу ищIэну щIэкIуа Iуэхугъуэ нэхъыщхьэ хъуащ гъэлъэгъуэныгъэ члисэ-жылагъуэ Iуэхур. А махуэм и пщэдджыжьым щоджэн нэхъыщхьэм тхьэлъэIу литургие щригъэкIуэкIащ Ашхабад и Воскресенскэ члисэм. Пщыхьэщхьэм – Тхьэм и Анэм и акафистым къыщеджэ тхьэлъэIур Ашхабад и Кирилло-Мефодиевскэ члисэм (Абадан хьэблэ) щрагъэкIуэкIащ.
ИужькIэ Пастыр нэхъыщхьэр Балкан вилаятым кIуащ.