Псыхуабэ епархием и псапащIэ IуэхущIапIэхэр хагъэхьэнущ социальнэ ориентированнэ НКО-хэм

2019 гъэм мэлыжьыхьым и 9-м Псыхуабэ епархием и социальнэ IуэхущIапIэхэм я унафэщIхэр хэтащ Ставрополь крайм Лэжьыгъэмрэ цIыхухэр социальнэу хъумэнымкIэ и Министерствэм. ЛIыкIуэхэм хагъэхьащ уэндэгъухэмрэ зи бынхэр зыщIыгъу, щытыкIэ гугъу ихуа анэхэмрэ я «Анэхэм папщIэ унэ» центрым, зи узыншагъэм къимыхь сабийхэмрэ щIалэгъуалэмрэ щыдэIэпыкъу «ДыгъафIэ къалэ» центрым, Свято-Георгиевскэ цIыхубз къулъшырыфым и «София» екIуэлIапIэ-пансионатым, иппотерапиемкIэ «Целебный Ессентуки» центрым я унафэщIхэр.

Епархием и псапащIэ IуэхущIапIэхэр социальнэ ориентированнэ мыкоммерцэ IуэхущIапIэхэм – щIыналъэ министерствэм и дэIэпыкъуныгъэ зыхуащIэхэм - я реестрым хэгъэхьэным тепсэлъыхьащ. «Мыкоммерцэ IуэхущIапIэхэм ятеухуауэ» Федеральнэ Законым ипкъ иткIэ, ахэр реестрым хагъэхьэмэ, IуэхущIапIэхэм къэрал бюджетым къыхэкIыу субсидиехэр къаIэрыхьэнущ, къэрал, муниципальнэ мылъкум щыщ иратынущ, я щIэныгъэм пщIэншэу хагъэхъуэнущ, я лэжьакIуэхэр пщIэншэу ирагъэджэнущ.

Зэхыхьэр щиухым унафэ ящIащ епархием и IуэхущIапIэхэм я реестрым хагъэхьэн папщIэ тхылъхэр зэхуахьэсыну. Абы кIэлъыплъынущ икIи дэIэпыкъунущ Ставрополь крайм ЛэжьыгъэмкIэ, цIыхухэр социальнэ хъумэнымкIэ и министерствэр.

Просмотров: 390

Поделиться

VK:39834