2026 гъэм шыщхьэуӏум и 1-м Урысей Федерацэм и лъэпкъ гвардием и дзэхэм я округым Жуковым и ц1эр зезыхьэ Кавказ Ищхъэрэ орденыр Пятигорск щыхъумэнымрэ къызэгъэпэщынымкӏэ и батальон щхьэхуэм щӏэуэ къыхыхьахэм ӏэтауэ дзэ тхьэрыӏуэ къыщащтащ.
А ӏуэхугъуэ нэхъыщхьэмкӏэ дзэм къулыкъу щызыщӏэхэм ехъуэхъуащ дзэ частым и унафэщӏхэм я лӏыкӏуэхэр, округым и унафэщӏым фӏэщхъуныгъэ зиӏэхэм ядэлэжьэнымкӏэ и дэӏэпыкъуэгъу протоиерей Филиппов Андрей, ӏыхьлыхэмрэ благъэхэмрэ.
Къыдэлажьэхэм я зэхэтыкӏэм и пэ къихуэу дзэ къулыкъущӏэ ныбжьыщӏэхэм тхьэ яӏуащ дзэ къалэныр екӏуу ягъэзэщӏэну, Урысейм и щхьэхуитыныгъэр, конституцэ ухуэкӏэр, лъэпкъыр, Хэкур лӏыгъэ яхэлъу яхъумэну.
Батальоным и офицерхэр щӏэуэ къыхыхьахэм ехъуэхъуащ дзэ ӏуэхур ехъулӏэныгъэкӏэ ирахьэкӏыну, екӏуу зыкъагъэлъэгъуэну. Абыхэм апхуэдэуи къыхагъэщащ тхьэрыӏуэр къызэращтар Росгвардиер илъэси 10 щрикъу илъэсым зэрекӏуэкӏар.
Дауэдапщэ нэужьым дзэм къулыкъу щызыщӏэхэр дзэ оркестрыр ящӏыгъуу гуфӏэгъуэ маршкӏэ екӏуэкӏащ. Итӏанэ щӏэуэ къыхыхьахэм я адэ-анэхэм зрагъэцӏыхуащ я къуэхэм я къулыкъумрэ псэукӏэмрэ я щытыкӏэхэр икӏи епсэлъащ унафэщӏхэм.