Тхьэм и Анэм и Покров махуэшхуэм ирихьэлIэу Кисловодск и Никольскэ члисэ зэхуэхьэсам псапэ бэзэр щекIуэкIащ. Свято-Сергиевскэ гимназием и гъэсэнхэм хьэщIэхэм хуагъэлъэгъуащ IэрыкIхэр, IэфIыкIэхэр. Бэзэрым зыкърезыгъэхьэлIахэм фIэхъус ярихащ члисэ зэхуэхьэсам и унафэщI щоджэн нэхъыжь Знаменский Иоанн. Абы ягу къигъэкIыжащ махуэшхуэм и мыхьэнэр. Члисэм и лэжьакIуэхэм зэрыдэ Iэмэпсымэхэмрэ IэфIыкIэхэмрэ къыхуашащ. Къалэ-зыгъэпсэхупIэм и хьэщIэхэмрэ абы щыпсэухэмрэ шей пщтыр ирагъэфащ. Подкумок къуажэм и Троицкэ екIуэлIапIэми IэфIыкIэхэр утыку кърихьащ. Бэзэрым щызэхуахьэса ахъшэр иратынущ екIуэлIапIэм къакIуэ хуэмыщIахэм. Гимназием и гъэсэнхэмрэ прогимназием и еджакIуэхэмрэ концерт ятащ. Махуэшхуэм ныбжьыщIэхэм щыпащащ асфальтым сурэт щащIу, квест къызэрагъэпэщу. Джэгум хэтахэм IэфIыкIэхэр иратащ.