ЦIыху щищым щIигъу щызэхуэсащ 2019 гъэм накъыгъэм и 18-м Горячеводскэ къуажэм и шы-спорт комплексым и къэзакъ зэхуэсым. ЗэIущIэм хэтхэм къагъэлъэгъуащ Горячеводскэ къэзакъ зэгухьэныгъэм и нэхъыжьхэм я Советым хэтхэр, атаман Поматов Валерий и отчётым едэIуащ. Къэзакъхэр къэгъэщIэрэщIэжыным хэлъхьэныгъэ хуэзыщIахэм иратащ «За усердие в дружбе» медалымрэ Ставрополь и къэзакъ зэхуэсым щIыхь зиIэ и дамыгъэм и I, II нагъыщэхэр.
ЗэIущIэм хэтащ Псыхуабэ и Iэтащхьэ Скрипник Андрей, Тэрч къэзакъыдзэм Ставрополь щиIэ атаман Пальчиков Сергей. Псыхуабэ епархием къэзакъхэм ядэлэжьэнымкIэ и къудамэм и унафэщI щоджэн нэхъыжь Фещенкэ Стефан зэхыхьэм хэтхэм яжриIащ Псыхуабэ, Черкесск щIыналъэхэм я архиепископ Феофилакт и псалъэхэр. Щоджэным къэзакъхэр къыхуриджащ щIалэгъуалэм я гъэсэныгъэм гулъытэ нэхъыбэ хуащIыну.
ХьэщIэхэм къапэплъэрт губгъуэ шхынхэр, уэрэдхэр, къафэхэр. Концертым зыкъыщигъэлъэгъуащ «Вольный ветер» фланкировкэ клубым, щапхъэу къалъыта «Казачье раздолье» къэфакIуэ ансамблым, «Серпантин» эстрадэ ансамблым.