2019 гъэм мэлыжьыхьым и 5-м Псыхуабэ, Черкесск щIыналъэхэм я архиепископ Феофилакт ЕссэнтIыгу къалэм и Пантелеимоновскэ члисэм Литургие щригъэкIуэкIащ. Щоджэн нэхъыщхьэм къулыкъур драгъэкIуэкIащ Псыхуабэ епархием и Административнэ секретариатым и унафэщI щоджэн Яковенкэ Илия, ЕссэнтIыгу члисэ округым и екIуэлIапIэхэм я щоджэнхэм благочиннэ щоджэн нэхъыжь Еланцев Сергий я пашэу, къардэн нэхъыжь Кубэ Димитрий.
Литургием и пэ къихуэу Пастыр нэхъыщхьэм Жорым и щхьэр хуигъэщхъащ, лъапIэныгъэр тыхь щIапIэм щIихьащ. Христос и Щэхухэм зыхигъэгъуэзэным и пэ къихуэу Щихънагъым фIэщхъуныгъэ зиIэхэм узэщIыныгъэкIэ захуигъэзащ. ТхьэлъэIу нэужьым члисэм и унафэщIым щоджэн Журавлёв Михаил Щихънагъыр хигъэгъуэзащ екIуэлIапIэм и библиотекэ, тхьэмахуэ школ къагъэщIэрэщIэжахэм. Щоджэн нэхъыщхьэр щыIащ просфорнэ зэрагъэпэщыжам икIи шхапIэм щылажьэхэм епсэлъащ.
ИужькIэ Щихънагъ Феофилакт члисэ музейр къызэIуихащ икIи игъэнэхуащ, Пантелеимоновскэ члисэм и тхыдэм теухуар, большевикхэм зэхакъутауэ щытам. 2016 гъэм дунейм ехыжа щоджэн нэхъыжь, унафэщI Журавлев Василий къару куэд тригъэкIуэдащ лъапIэныгъэр къэгъэщIэрэщIэжыным.
Экспозицэм хагъэхьащ щоджэным зэрихьэу щыта фэилъхьэгъуэхэр, япэ унафэщI щоджэн нэхъыжь Тицкий Феодори хуэдэу, сурэтхэр, тхьэлъэIу тхылъхэр, члисэ Iэмэпсымэхэр, уэзджынэхэр, жорхэр. Апхуэдэу къагъэлъэгъуащ ЕссэнтIыгу зыгъэпсэхупIэм и тхыдэр. Ауэ хьэпшып нэхъ лъапIэхэм ящыщщ япэрей члисэм къыщIэнахэр – тхьэнапэхэр, иконосасыр, чырбышхэр, къалэм щыпсэухэмрэ щоджэнхэмрэ яхъумахэр, архив дэфтэрхэр, Пантелеимон и цIэр зезыхьэ члисэм и тхыдэм теухуахэр.
Экспозицэр гъэхьэзырынымкIэ унафэщIым къыдэIэпыкъуащ лъахэхутэ Лесовой Михаил, Минводы къалэм и Покров члисэм члисэ музей къыщызэIузыхар. Пастыр нэхъыщхьэм зыхигъэгъуэзащ хьэпшыпхэм, музейр къызэзыгъэпэщам фIыщIэ хуищIащ, тхыдэ фэеплъхэмрэ духовнэ щIэинхэмрэ хъумэным хэлъхьэныгъэ зэрыхуищIам, хьэщIэ лъапIэхэм я тхылъым япэ тхыгъэр зэрыритхам папщIэ.