2019 гъэм щIышылэм и 23-м Псыхуабэ, Черкесск щIыналъэхэм я архиепископ Феофилакт хэтащ Урысей МЧС-м и Iэтащхьэм иригъэкIуэкIа зэIущIэм, Кавказ-Ищхъэрэ федеральнэ щIыналъэм ЧС (РСЧС) къэхъунымрэ абы и лъэужьыр гъэкIуэдыжынымкIэ зыуэ щыт къэрал системэм зэфIигъэкIахэр къэпщытэжыным теухуам. Зэхыхьэм хэтащ УФ-м и Президентым и полномочнэ лIыкIуэу КИФЩI-м щыIэ Матовников Александр, Ставропольем и губернатор Владимиров Владимир, Ингуш Республикэм и Iэтащхьэ Евкуров Юнус-Бэч, Къэрэшей-Шэрджэс Республикэм и Iэтащхьэ Темрезов Рашид, МЧС-м и щIыналъэ структурэу Кавказ Ищхъэрэм щыIэхэм я унафэщIхэр.
IуэхущIапIэм и сайтым къызэрыщыхьамкIэ, министр Зиничев Евгений къыхигъэщащ цIыху куэд зэкIуалIэ объектхэр Iэмал имыIэу страховкэ щIын зэрыхуейр, сату щапIэ центрхэр хыхьэу, IуэхущIапIэр зейм объектыр мафIэс къэхъункIэ зэрыхъунымкIэ ихь жэуаплыныгъэм хигъэхъуэн папщIэ. Абы ягу къигъэкIыжащ МЧС-м мафIэсым пэщIэтыным ехьэлIа унэтIыныгъэм и зэхъуэкIыныгъэхэр къызэригупсысар. Къэрал мафIэсгъэункIыфI инспекторхэм Iэмал яIэщ профилактикэ рейдхэр цIыху куэд щызэблэкI IуэхущIапIэхэм щрагъэкIуэкIыну, сату щапIэ центрхэри хыхьэу. Апхуэдэу къегъэлакIуэ IуэхущIапIэм къахуегъэлъагъуэ IуэхущIапIэхэр бэджэнду къэзыщтахэр е пэш щхьэхуэхэр мыхъуу объектыр зэрыщыту къапщытэну. ЗэIущIэм хыхьэу цIыхушхуэ щызекIуэ щIыпIэхэр къапщытэным ехьэлIа унафэ къащтэну. Иджыпсту мафIэсгъэункIыфI кIэлъыплъыныгъэм махуэ зыбжанэ и пэ иту хъыбар ярегъащIэ къапщытэну IуэхущIапIэхэр зейхэм.
Министрым и къалэнхэр пIалъэкIэ зыгъэзащIэ Яцуценкэ Виктор къыхигъэщащ Кавказ Ищххъэрэм ЧС къэхъуным ехьэлIауэ шынагъэ щыIэхэм я интерактивнэ атлас къызэрагъэпэщыным теухуа я мурадхэм. ЗэIуха Iыхьэр
интернет-ресурс зэIухахэм, УФ-м и гъэзэщIакIуэ властхэм я органхэм къыщахьынущ. Атласым и зэхуэщIа Iыхьэр ведомствэм и сайтым къыщывгъуэтынущ.
Апхуэдэу Урысей МЧС-м и Iэтащхьэр зэхыхьэм хыхьэу арэзы техъуащ Ставрополь и губернатор Владимиров Владимир зыпэмыплъа шынагъуэм и зэран зэкIахэм зыуэ щыт дэIэпыкъуныгъэр зэрат щIыкIэм зэхъуэкIыныгъэхэр хэлъхьэным теухуауэ къыхилъхьа еплъыкIэм. «Зыуэ щыт ахъшэ дэIэпыкъуныгъэ зыпэмыплъа федеральнэ шынагъуэ къызыщыщIахэм щIыналъэхэм щыхуащIэну хуит дощI, УФ-м и Правительствэм и резерв фондым пэмыплъэу», - жиIащ Владимиров В. Абы жиIащ апхуэдэ мылъкур УФ-м и Правительствэм и резерв фондым къыхэкIыу щIыналъэхэм зэрыратыжынур. Губернаторым зэрыжиIэмкIэ, а Iуэхур иджыпсту кIыхьлIыхьщ, цIыхухэр дэIэпыкъуэгъу поплъэ. «А Iуэхугъуэр зэрыдгъэпсынщIэнум дыхущIокъу, ауэ ар зылъахъэхэр щыIэщ. Ар зэрыдгъэзэкIуэжынум теухуа псалъэ быдэ фызот», - къыхигъэщащ Урысей МЧС-м и Iэтащхьэм.