2018 гъэм накъыгъэм и 3-м урысей полицэм егъэлъапIэ ар къызэрызэрагъэпэщрэ илъэс 300 зэрырикъур. Абы ехьэлIа зэхыхьэхэр Псыхуабэ щекIуэкIащ. Абы хэтащ ветеранхэр, Урысей МВД къэрал IуэхущIапIэм КИФЩI-м щиIэ къудамэм и унафэщIымрэ абы хэтхэмрэ. Зэхыхьэм зыкърагъэхьэлIащ УФ-м и полномочнэ лIыкIуэу КИФЩI-м щыIэ Белавенцев Олег, УФ-м Кавказ Ищхъэрэ IуэхухэмкIэ и министрым и къуэдзэ Кузнецов Владимир. Псыхуабэ къалэм и Iэтащхьэ Скрипник Андрей, Псыхуабэ, Черкесск щIыналъэхэм я архиепископ Феофилакт.
ФIыщIэ, хъуэхъу псалъэ гуапэхэр Псыхуабэ щыпсэухэм я мызакъуэу абы и хьэщIэхэми, Кавказ Ищхъэрэ федеральнэ щIыналъэм исхэм я хабзэхъумэхэм яхуэгъэзащ. Урысей МВД ГУ-м КИФЩI-м щыIэм и унафэщI, полицэм и генерал- лейтенант Бачурин Сергей и псалъэм къыхигъэщащ къэралкIуэцI органхэм я лэжьакIуэхэр – зи IэщIагъэм хуэпэж, зи тхьэрыIуэм емыпцIыжщ, хуей щыхъукIэ я псэ емыблэжу.
- Тхыдэм къриубыдэу жылагъуэ-политикэ щытыкIэ зэмылIэужьыгъуэхэм полицэм хабзэр хъумэным ехьэлIа къалэн гугъухэр, хабзэр къызэпымыудыным, къэрал Iуэхухэр хъумэным ехьэлIахэр зэфIихащ, - ягу къигъэкIыжащ УФ-м и Президентым и полномочнэ лIыкIуэу КИФЩI-м щыIэ Белавенцев Олег. – Ноби полицэм цIыхухэм я узыншагъэмрэ шынагъуэншагъэмрэ, я щхьэхуитыныгъэмрэ хуитыныгъэмрэ хъумэным хуолажьэ, щIэпхъэджащIэхэм япэщIэтщ, жылагъуэм къащхьэщож. 2017 гъэм къриубыдэу къагъэлъэгъуа хахуагъэмрэ лIыхъужьыгъэмрэ папщIэ Ищхъэрэ-Кавказ округым и къэралкIуэкI органхэм я лэжьакIуэ 53-рэ ягъэпэжащ.
КъэралкIуэцIыдзэ органхэм я лэжьакIуэхэм ехъуэхъуащ архиепископ Феофилакт. Щихънагъыр полицэм и лэжьакIуэхэм я къулыкъур щрахьэкIкIэ Тхьэр къадэIэпыкъуну ехъуэхъуащ. Иджыблагъэ Пастыр нэхъыщхьэм тхьэлъэIу щригъэкIуэкIащ полицэм и лэжьакIуэ хэкIуэда 18-м я фэеплъ къызэIуахам деж. Урыс полицэр илъэс 300 зэрырикъумкIэ къызэхуэсахэм ехъуэхъуащ Псыхуабэ къалэм и Iэтащхьэ Скрипник Андрей. Къалэм и Iэтащхьэм Псыхуабэ дэт фэтэритIым я IункIыбзэIуххэр яритащ полицэм и лэжьакIуитIым. Апхуэдэу къэралкIуэцIыдзэм къыхэжаныкIа и лэжьакIуэхэм къэрал дамыгъэхэр, фIыщIэ тхылъхэр тыгъэ хуащIащ. Зэхыхьэр щиухым махуэшхуэ концерт ирагъэкIуэкIащ.