Быйыл апрель айны 25-де Пятигорске бла Черкесскени архиепископу Феофилакт, наркотиклени тузагъына тюшгенлеге деб ишленнген Къабарты-Малкъарта реабилитацион аралыкъны ачды. Ол Прохладный районну Благовещенск элинде клисаны арбазында ишленнгенди, кеси да 25 пациентни сыйындырлыкъды. «Къабарты-Малкъар Шимал Кавказда быллай клиса-джамагъат проект болуб биринчи республикады. Бу ишге разылыкъ бериб джол ачханлары ючюн Сыйлы Патриарх Кириллге эмда ресбуликаны Башчысы Коков Юрийге джюрек разылыгъымы билдиреме»,-деб чертди ачылыуну церемониясында Архиерей.
Бу аралыкъ бла республиканы саулукъ сакълагъан учрежденияларыны араларында, врачла бла психологла мунда пациентле бла ишлерча келишим да этилгенди. Бу аралыкъда ишлеген усталаны арасында наркотиклени тузагъындан къутулулгъанла да бардыла.Реабилитацион аралыкъ джамагъат организацияны республикан грантларыны кючю бла къуралгъанды, анга учредитель православ приход болгъанды. Аралыкъны ишине деб Прохладный районну башчысы кегет бачхала орнатыргъа джер бергенди. Иесиз болуб тургъан келню джангыртыу бла чабакъ мюлк къураргъа да мурат барды.
Ол кюн огъунакъ архиепископ Феофилакт Къабарты-Малкъарны Башчысы Коков Юрий бла тюбешген эди. Республиканы Башчысыны пресс-къуллугъу билдиргенден тюбешиуню кезюуюнде регионда миллетле эмда динле арасы джарашыулукъну бегитиуню юсюнден селешиннгенди. Анда дагъыда баш борчланы бири джаш телю бла иш бардырыу, экстремизмге къаршчы туруу болду.
Архиепископ республикан башчыгъа Москва бла бютеу Эресейни Сыйлы Патриархы Кириллни атындан багъышлау этди. Биринчи болуб Къабарты-Малкъарда эмда Шимал Кавказда, Прохладный районну Благовещеннск элинде клисаны арбазында реабилитацион аралыкъны ачылгъаны, болушлукъ излеб инджилген адамгъа уллу себеб берлигине архиепископ Феофилакт толу ышыннганын билдирди.