2017 гъэм фокIадэм и 17-м, Прохладнэ къалэм (КъБР) щекIуэкIащ Псыхуабэ, Черкесск щIыналъэхэм я щихънагъ Феофилакт и саугъэтыр къэхьынымкIэ къэзакъ щIалэгъуалэм я еплIанэ спартакиадэр. Тэрч къэзакъ зэгухьэныгъэр къызэрызэрагъэпэщрэ илъэс 440-рэ зэрырикъум теухуа спартакиадэм и пэ Прохладнэм и Никольскэ члисэм тхьэмахуэ тхьэлъэIу щригъэкIуэкIащ Пастыр нэхъыщхьэм. Щоджэн нэхъыщхьэм къулыкъур драгъэкIуэкIащ щоджэнхэм, епархием и Iэгъуэблагъэм къэзакъ зэгухьэныгъэхэм я нэIэ тезыгъэтхэм.
Спартакиадэр къыхэзылъхьахэм я мурад нэхъыщхьэр Тэрч-Малкэ округым и къэзакъ Къэбэрдей-Балъкъэрым и Iэгъуэблагъуэм щыпсэухэм ядэIэпыкъунырщ, тхыдэ, щэнхабзэ, спорт хабзэхэр къэгъэщIэрэщIэжынырщ, къэзакъ зэгухьэныгъэхэм я Iуэху бгъэдыхьэкIэхэмкIэ зэхъуэжэнырщ, Кубань къэзакъыдзэм физкультурэмрэ спортымкIэ яIэ Iуэху еплъыкIэхэр зыр зым хагъэгъуэзэнырщ. Зэхьэзэхуэр къалэм и спорткомплексым и Iэгъуэблагъуэм зэпеуэ лIэужьыгъуихымкIэ щекIуэкIащ.
Спартакиадэр къыщызэIуахым щихънагъ Феофилакт зэхыхьэм хэтхэмрэ абы и хьэщIэхэмрэ Тхьэм и нэфIыр къащыхуэну ехъуэхъуащ икIи фIэщхъуныгъэ быдэ яIэну, я хабзэхэр ягъэпэжыну къыхуриджащ. Республикэм и Iэтащхьэ КIуэкIуэ Юрий къыбгъэдэкI фIэхъускIэ зэхыхьэм хэтхэм захуигъэзащ граждан зэгухьэныгъэхэмрэ лъэпкъ IуэхухэмкIэ институтхэм я зэпыщIэныгъэхэмкIэ управленэм и Iэтащхьэ КIурашын Анзор.
Спартакиадэм хэтащ гупибгъу Къэрэшей-Шэрджэсым, Къэбэрдей- Балъкъэрым, Ставрополь крайм щыщхэу. ЕплIанэ къэзакъ спартакиадэм и ещанэ увыпIэр иратащ Урупскэ районным и къэзакъ зэгухьэныгъэм. ЕтIуанэр хуагъэфэщащ Прохладнэ районым и къэзакъ зэгухьэныгъэм. Япэр лъагъэсащ Псыхуабэ къэзакъхэм.
КъэпщытакIуэхэм зэпеуэм пашэ щыхъуахэр ягъэлъэпIащ. ЩIыхь тхылъхэм къадэкIуэу пашэ хъуахэм саугъэтхэр хуагъэфэщащ – щихънагъ Феофилакт къыбгъэдэкI тренажерхэр.